Soltústik Qazaqstanda bir qalanyń jáne 70 aýyldyń ákimi saılanady
SQO óńirlik kommýnıkatsııalar qyzmetinde jergilikti ákimderdiń saılaýyna daıyndyq barysy jaıynda aıtyldy.
SQO saılaý komıssııasynyń tóraǵasy Tilegen Qaskınniń aıtýynsha, 61 ákimniń ókilettik merziminiń aıaqtalýyna oraı jáne 10 ákimniń óz ókilettigin merziminen buryn tapsyrýyna baılanysty saılaý ótedi.
Saılaýǵa 14 aýmaqtyq jáne 174 ýchaskelik saılaý komıssııasy jumyldyrylǵan, 994 adam jumys istep jatyr.
«Aýdandyq deńgeıdegi qala ákimi men aýyldyq ákimderdi saılaýǵa 218 eldi mekenniń turǵyndary qatysady. Eń shalǵaı ornalasqan aýyldyq okrýg Ǵ.Músirepov atyndaǵy aýdanda ornalasqan. Qyrymbet aýyldyq okrýgi men aýdan ortalyǵy Novoıshımkanyń arasy - 170 km. 54 eldi mekende saılaý ýchaskesi joq. Sol sebepti bul aýyldardyń turǵyndary saılaý ýchaskelerine arnaıy kólikpen jetkiziledi», - deıdi Tilegen Qaskın.
4 shilde kúni jergilikti atqarýshy organdar naqtylanǵan saılaýshylardyń tizimin saılaý ýchaskelerine berdi. SQO-da 60 471 adam daýys bermek.
Eń kóp saılaýshy Mamlıýtka qalasynda, munda 5 366 adam daýys beredi.
Al aýyldyq okrýgterdiń ishinde eń kóp saılaýshy Ǵ.Músirepov atyndaǵy aýdannyń Nejınka aýyldyq okrýginde, munda 1941 adam saılaýǵa qatysady.
Eń az saılaýshy – 137 adam Tımırıazev aýdany Dzerjınskıı aýyldyq okrýginde daýys beredi.
18 jasqa tolǵan 280 adam alǵash ret saılaýǵa qatysady.
«Turǵyndar saılaý ýchaskelerine kelip, saılaýshylardyń tizimimen tanysa alady, ózderiniń málimetterin tekserip, enbeı qalǵan jaǵdaıda tizimge qostyra alady. Múmkindigi shekteýli jandarǵa da saılaý ýchaskelerinde barlyq qajetti jaǵdaılar jasalady. Pandýstar qoıylǵan, taktıldi aqparat bar. Arnaıy burysh qurylyp, arnaıy baǵdarlamasy bar kompıýter ornatyldy, lýpalar qoıyldy. Jalpy múmkindigi shekteýli jandardyń sany – 396. 138 adam múgedekter arbasyna tańylǵan bolsa, 152 adam nashar kóredi jáne 106 adamnyń qulaǵy kemis», - deıdi SQO saılaý komıssııasynyń tóraǵasy Tilegen Qaskın.