Soqqyǵa shydamady: Jambyl oblysynda jasóspirim mert boldy

TARAZ. KAZINFORM – Jaraqat alǵan oqýshyny úıine jetkizgenimen, jedel járdem kelgenshe ol kóz jumdy, dep jazdy Kazinform agenttiginiń óńirdegi menshikti tilshisi.

Oqıǵa Shý aýdanynyń Kókkaınar aýylynda bolǵan. Fýtbol matchynan keıin jeńilgenin moıyndamaǵan úsh joǵary synyp oqýshysy dúken artynda kishi synyp oqýshylaryn jınap, olardy aıaýsyz soqqyǵa jyqqan.

Aldyn ala málimet boıynsha, 2007 jyly týǵan jasóspirim 2010 jyly týǵan balanyń keýde tusyna soqqy jasaǵan. Jábirlenýshi esinen tanyp qalǵan. Oqıǵa týraly onyń anasyna dúken satýshysy habar bergen. Úıine jetkizilgen bala ózin nashar sezinip, qusyp, demala almaıtynyn aıtqan. Ókinishke qaraı, dárigerler kómek kórsetýge úlgermegen. Bala kóz jumdy.

Atalǵan fakti boıynsha QR QK 106-baby 3-bóligi («Densaýlyqqa qasaqana aýyr zııan keltirý») boıynsha sotqa deıingi tergeý bastaldy.

Jedel-izdestirý sharalary barysynda 16 jáne 17 jastaǵy eki kúdikti ustaldy.

— Qazirgi ýaqytta bul is boıynsha barlyq qajetti tergeý áreketteri júrgizilip jatyr, — dep málimdedi polıtsııa departamenti.

Eske sala keteıik, buǵan deıin Jambyl oblysynda balalarǵa qatygezdik kórsetý faktisi boıynsha tergeý aıaqtalǵan bolatyn.

Sondaı-aq, Tarazdaǵy mektep-ınternatta qyz balaǵa jasalǵan qorlyq týraly da habarlanǵan edi.