Soǵys qupııalary: Eýrazııa birinshi arnasynda tarıhı serıal kórermenge jol tartady
ASTANA. KAZINFORM — 5-9 mamyr aralyǵynda «Eýrazııa birinshi arnasynda» kóp bólimdi «Allıgator» kórkem fılmi jaryqqa shyǵady. Teletýyndy buryn qupııa sanalǵan arhıv materıaldary negizinde túsirilgen tyldaǵy soǵys týraly baıandaıdy.
Fılm — Reseıdiń (Birinshi arna) jáne Qazaqstannyń (Eýrazııa Birinshi arnasy) birlesken jobasy.
Tarıhı serıalda Ekinshi dúnıejúzilik soǵysy kezinde Almaty qalasynda bolǵan oqıǵalar negizinde órbıdi. Sol kezeńde qalaǵa zaýyttar, teatrlar men kınostýdııalar evakýatsııalanǵan. Sonymen qatar Máskeý, Kıev, Harkov, Kıshınev, Mınsk qalalarynan urylar men páter tonaýshylar da tylǵa aǵyldy. Olardyń qatarynda keıinnen Stanıslav Govorýhınniń «Kezdesý ornyn ózgertýge bolmaıdy» (Mesto vstrechı ızmenıt nelzıa) fılminde beınelengen «Qara mysyq» (Chernaıa koshka) atty qatygez qylmystyq toptyń músheleri de bar.
Qazaqstannyń baı paıdaly qazba qorlary da «Tretıı reıh» agentteriniń nazaryn aýdarǵan. Serıalda partııa jáne sharýashylyq basshylaryna jasalǵan qastandyqtar, evakýatsııalanǵan kásiporyndardaǵy teraktiler men rejımge narazy azamattardy óz jaqtaryna tartýmen aınalysqan dıversanttardy joıý boıynsha arnaıy operatsııalar baıandalady.
— Bul fılm — Qazaqstannyń Jeńiske qosqan orasan zor úlesi týraly. 528 Keńes Odaǵynyń Batyry — osynyń aıqyn dáleli. Olardyń ishinde Álııa Moldaǵulova men Mánshúk Mámetova da bar — ekeýi de maıdanǵa shaqyrtylmasa da, óz erikterimen attandy. Bul — patrıotızmniń buryn-sońdy bolmaǵan kórinisi, ony umytpaýymyz kerek. Fılm qyzyqty, shıelenisti ári shynaıy shyqty. Ol óz kórermenin tabatynyna jáne halyq arasynda keń taralatynyna senimdimin, — dedi «Eýrazııa Birinshi arnasy» bas dırektorynyń mindetin atqarýshy Arman Qudaıbergenov.
Serıaldyń rejısseri — Vladımır Vorobev. Akterlik quramda — qazaq kınosynyń ańyzy, Qazaqstannyń halyq ártisi Merýert Ótekesheva, Reseıdiń eńbek sińirgen ártisi Tatıana Dogıleva, Pavel Trýbıner, Aıdana Elemes, Dmıtrıı Astrahan, Erbolat Toǵyzaqov, Erken Ǵubashev, Álıhan Káribaev jáne Azamat Nyǵmanov bar.
Aıta keteıik, Jeńistiń 80 jyldyǵy mereıtoıy qarsańynda Qazaqstannyń Jeńiske qosqan úlesi týraly jańa jınaq jaryq kórdi.
Eske sala ketsek, Jeńistiń 80 jyldyǵyna oraı Prezıdent Teleradıokesheni erekshe jobany iske qosty. Kazinform agenttiginiń fotomuraǵatyndaǵy Ekinshi dúnıejúzilik soǵys jyldary kezinde túsirilgen sırek sýretter jańa tehnologııa kómegimen túrli túske boıalyp, qımyldaıdy.