Soǵym maýsymy: et baǵasy ózgere me

ASTANA. KAZINFORM – Kúz keldi, endi soǵym maýsymy bastalady. Kópti alańdatatyny – ettiń baǵasy. Aýyl sharýashylyǵy vıtse-mınıstri Azat Sultanovqa osyǵan qatysty saýal qoıǵan edik.

- Óńirlerde shamamen 50 myń tonna et qory bar, bul - birneshe aıǵa jetetin kólem. Baǵany retteý mehanızmi jergilikti ákimdikterge tıesili. Et tapshylyǵy joq. El ishindegi baǵa saıasatyna ımporttaýshylar tarapynan qysym bar. Qymbattaýy múmkin. Eger qymbattasa, baǵany ustap turýǵa barlyq mehanızm qarastyrylǵan. Óıtkeni et óndirisine jáne onyń ózindik qunyna qaraımyz. Ózindik quny - kelisine shamamen 1800–1900 teńge kóleminde. Al qazir naryqtaǵy baǵa - 3500 teńgeden bastalady, bul - áleýmettik baǵa, - dep jaýap berdi Azat Sultanov BAQ ókilderiniń saýalyna.

Sondaı-aq vıtse-mınıstr barlyq saýda alańyndaǵy baǵaǵa taldaý jasalǵanyn jáne turaqty ekenin aıtyp otyr.

- Et baǵasynyń tómendeýi jem-shóp qorynyń qamtamasyz etilýine de baılanysty. Qysta shamamen 30 mln tonna jem-shóp qamtamasyz ettik. Ekinshiden, aýyl sharýashylyǵy ónimderiniń ózindik quny árqashan shıkizat qunyna baılanysty emes, oǵan jalaqy jáne basqa shyǵyndar da kiredi. Qyrkúıek aıynda baǵa búgingi deńgeıde saqtalady. Sonymen qatar baǵaǵa kórshi elder tarapynan artqan suranys áser etedi. Naryqty rettemeımiz, - dep sendirdi mınıstrdiń orynbasary.

Buǵan deıin Saýda jáne ıntegratsııa mınıstri Arman Shaqqalıev et baǵasyna qatysty naryqqa tikeleı buıryq bere almaımyz degen edi. 

Aıta keteıik, bıyl elimizde 7 aıda 608,8 myń tonna et naryqqa shyǵaryldy.