Smaǵul Raqymbekulynyń «Jyrlarym meniń sóılesin» atty kitabynyń tanystyrylymy ótti
2017 jyly dúnıeden ótken qalamgerdiń óleńderi jeke kitap bolyp jaryq kórip otyr.
Osy bir mazmundy basqosýdy júrgizgen jazýshy Aldan Smaıyl óziniń dosy, áriptesi S.Rahymbek týraly tuşymdy maǵlumattardy, ekeýiniń bastan keshken qyzyqty oqıǵalardy aıtyp berdi.
Aıta ketý kerek, Smaǵul Rahymbek 1952 jyly Aqmola oblysynyń Qorǵaljyn aýdanynda dúnıege kelgen. Eńbek joly aýdandyq «Shamshyraq» gazetinen bastalǵan. Aqmola oblystyq teleradıo kompanııasynda aǵa redaktor, bas redaktor, keıin QR Prezıdentiniń Teleradıo kesheninde bas radaktor qyzmetterin atqarǵan. Ol qoǵamdyq jumystarǵa belsene aralasyp, osy óńirde ana tilimizdiń órken jaıýyna, halqymyzdyń óneri men medenıetiniń damýyna úles qosty.
Qadirli qalamger qyrýar is tyndyryp, qarapaıym ómir súrdi. Óziniń týǵan eli men jerin jyrlap ótti. Sondaı-aq Astananyń árbir jetistigine qýandy. Táýelsiz memleketimizdiń tuǵyrly bolýyna jan-tánimen qyzmet etti. Dostary da kóp boldy. Osy Arqa óńirine elimizdiń ár qıyrynan kóship kelgen árbir qazaqty baýyrym dep qabyl aldy. Qalam ustaǵan ini-qaryndastaryn erekshe qadir tutty.
Kózi tirisinde S.Rahymbektiń «Arý men Arlan», «Kóńil shýaǵy», «Aıdyndaǵy aq jelken», «Temir tordaǵy tirshilik» atty prozalyq kitaptary jaryq kórdi. Osy oraıda, jazýshy A.Smaıyl qalamgerdiń kórkem týyndylary oqyǵan adamǵa úlken oı salatynyn, biz ómir súrip otyrǵan qoǵamnyń tynys-tirshiligin aıqyn kórsetetinin aıta kelip: «Smaǵuldyń prozalyq shyǵarmalary áli baǵasyn alǵan joq», - dedi. Áriptesterine aldaǵy ýaqytta osy jaǵyna da tereńirek mán berý kerektigin eske salyp ótti.
QR Prezıdenti Teleradıo kesheniniń bas dırektory Erlan Bekhojın men Astana qalasynyń turǵyny, Batyr ana Hadısha Jalmaǵambetova jańa kitaptyń lentasyn qııý qurmetine ıe boldy.
Osy keshte aqyn-jýrnalıst Aıbatyr Seıtaq qalamger dúnıeden ótken kezinde shyǵarǵan «Jaqsy jandy kim qııady ajalǵa?» degen jáne «Smaǵul aǵa rýhymen syrlasý» atty óleńderin oqyp berdi.
Bul kúni S.Rahymbek týraly estelik aıtamyn deýshiler óte kóp boldy. Óıtkeni el aǵalary, dostary men birge qyzmet jasaǵan áriptesteri asyl azamat jaıly óz oılaryn irkip qalǵan joq. Atap aıtqanda, Mahat Sadyq, Baýyrjan Aımaqov, Jumataı Súıindikov, Amangeldi Jumabekov, Erlan Qojageldıev jáne basqa da azamattar sóz alyp, Smaǵuldyń adamı asyl qasıetteri jaıly oı tolǵady. Oblystyq teleradıo kompanııada uzaq jyldar boıy rejısser qyzmetin atqarǵan Baǵdat Kóbenova qalamgerdiń óz áriptesterimen syıly qarym-qatynasta bolǵanyn aıtyp berdi. Al Qorǵaljyn aýdanynan kelgen Sáýle Núrken alty jyl buryn Smaǵuldyń 60 jasqa tolǵan mereıtoıy aýdan boıynsha jaqsy atalyp ótkenin, mektepterde birneshe kezdesýler bolǵanyn tilge tıek etti.
Eýrazııa ulttyq ýnıversıtetiniń professory, jýrnalıst-ǵalym Muratbek Toqtaǵazın aqynnyń murasy oqyrmanǵa jetip otyrǵany jaqsy bastama ekenin aıta kelip, aldaǵy ýaqytta Smaǵul Rahymbektiń esimin ózi týyp ósken Qorǵaljyn aýdanyndaǵy bir mektepke berý týraly usynys jasady. Sonymen qatar kún saıyn qarqyndy ósip jatqan elordamyzdyń jańa bir kóshesi qalamgerdiń atymen atalsa, qyryq jyldaı osy qalada turyp, ulttyq rýhymyzdyń kóterilýine, rýhanı salanyń damýyna aıanbaı qyzmet etken aqynǵa jasalǵan úlken qurmet ekenin alǵa tartty. Al ardager jýrnalıst Bádýan Imashuly áriptesi jaıly esteliginiń sońynda Smaǵuldyń Astanada turǵan úıine eskertkish taqta ornatý týraly usynysyn jetkizdi.
Kezinde tanymal dıktor bolǵan radıo ardageri Kúlásh Moldahmetova osy keshte S.Rahymbektiń Muqaǵalıǵa arnalǵan «Sen ulysyń Qarasazdyń» atty óleńin oqyp berdi. Bul óleńi:
«Men-daǵy, Muqa, seniń jalǵasyńmyn,
Kıesi bar aqyndyq mandatyńnyń.
Bir ózińsiń - marshaly qara óleńniń,
Qatardaǵy men onyń soldatymyn!»- dep aıaqtalady. Sondaı-aq aqynnyń óz jaryna arnaǵan «Shyraǵymdy úrlediń» degen óleńin de mánerlep oqydy.
Astana turǵyny Serik Baıjuma «Aqyn Smaǵul» degen óleńin oqyp, S.Rahymbekti erekshe qurmetteıtinin, óziniń uly dúnıeden ótkende qaıǵynyń azabynan alyp shyqqanyn baıandap berdi. Sondaı-aq Qorǵaljyn aýdanynyń Janteke aýylynan arnaıy kelgen Baıan Amangeldiqyzy «Máńgilikke este qaldy beıneńiz» atty arnaý óleńin oqydy.
Endi jańa jyr jınaq týraly birer sóz. 15 baspa tabaqtan turatyn jyr kitap mazmuny, kótergen taqyryptary boıynsha «Otanym - ystyq júregim», «Qyranyń bop túledim», «Arnaldy izgi tilegim», «Óz otbasym - tiregim», «Óleńmen ómir súremin», «Janymnyń izdep bir emin», «Aralap kelem jyr elin», «Ánge aınalsyn óleńim» jáne syn-syqaqtar toptastyrylǵan «Sózben soıyp, iredim» atty toǵyz taraýǵa bólingen. Aqynnyń ár jyldary túsken fotosýretteri de osy jınaqqa engen.
Aqyn «Óleńmen órdim ómirdi» atty jyrynda eldiń amandyǵyn tileı otyryp:
«Qınalyp halyq júrmesin,
Aıtpasyn eshkim muń-zaryn!
Bosaǵa jaqta qalmasyn
Urpaǵym menen jyrlarym!»- dep óz amanatyn jetkizipti. Óziniń týǵan jerge tý tikkenin aıta kelip, osy óleńin:
«Aqynǵa qurmet kerek dep
El-jurtym kórer toı keshin.
Ózim joq jerde,
Qashanda
Jyrlarym meniń sóılesin!» degen oımen túıindegen eken. Kitaby jaryqqa shyǵý arqyly aqynnyń murasy oqyrmanǵa jetti.
