SQO joldarynda polıtseıler dron paıdalana bastady
PETROPAVL. KAZINFORM – Soltústik Qazaqstan oblysynda joldaǵy qaýipsizdik pen qoǵamdyq tártipti qadaǵalaýda drondar qoldanyla bastady.
SQO Polıtsııa departamenti baspasóz qyzmetiniń málimetinshe, ushqyshsyz ushý apparattary qalalyq jaǵdaıda beınebaqylaýmen qamtylmaǵan jerlerde polıtsııanyń senimdi quralyna aınalýy múmkin. Joǵarydan qoǵamdyq oryndarda temeki shegý, abattandyrý erejelerin buzý faktileri aıqyn kórinedi. Budan bólek, dronmen kólik júrgizý kezinde telefondy paıdalaný, qaýipsizdik beldigin taqpaý jáne t.b. zań buzýshylyqtar tirkeledi.
Sondaı-aq drondar trassalarda jol júrisi qaǵıdalarynyń óreskel buzýshylyqtaryn anyqtaýǵa múmkindik beredi. Qala syrtyndaǵy joldarda bul apparattar qarsy baǵyttaǵy qozǵalys jolaǵyna shyǵýdy, manevr jasaý erejelerin, jaryq shamdaryn paıdalaný erejelerin buzý sııaqty derekterdi anyqtaı alady. Tirkelgen quqyq buzýshylyqtar jaqyn mańdaǵy polıtsııa jasaǵyna jiberiledi, odan keıin patrýldik polıtsııa qyzmetkerleri quqyq buzýshyǵa qatysty ákimshilik sıpattaǵy sharalar qabyldaıdy.
- Polıtsııa qyzmetindegi zamanaýı tehnıkalyq quraldar – «Zań men tártip» qaǵıdatyn tıimdi iske asyrýdyń qajetti quramdas bóligi. Drondy paıdalaný – aıyppuldar men hattamalar sanyn kóbeıtýdiń tásili emes. Basty mindet – kósheler men joldardy ár adam úshin qaýipsiz etý. Drondar qaýipti jaǵdaılardy der kezinde baıqaýǵa jáne qaıǵyly jaǵdaılardy boldyrmaýǵa, qajetti sharalar qabyldaýǵa kómektesedi. Bul – adamdardyń tynysh jáne jaıly ómir súrýine taǵy bir qadam. Bul jumys polıtsııa men prokýratýranyń tyǵyz ózara is-qımyly arqyly júzege asyrylyp jatyr, - deıdi tártip saqshylary.
Buǵan deıin SQO-da drondar sý tasqyny qaýpin baqylaý úshin qoldanylyp jatqanyn jazǵan edik.