SQO jastaryn ne qyzyqtyrady: Áleýmettik zertteýdiń qorytyndysy jarııalandy

PETROPAVL. QazAqparat – Soltústik Qazaqstan oblysynda mekteptiń joǵary synyp jáne kolledj oqýshylary arasynda qazirgi jastardyń oıy men qyzyǵýshylyqtaryn anyqtaý maqsatynda áleýmettik zertteý júrgizildi. 4 aıǵa sozylǵan jobaǵa 5 myńǵa jýyq jas qatysty, dep habarlaıdy QazAqparat tilshisi.

Áleýmettik zertteýge tapsyrys berýshi – SQO densaýlyq saqtaý basqarmasy. Maqsat – jastardyń salamatty ómir saltyna kózqarasyn bilý. Óıtkeni ınternettiń damýy, túrli gadjetter, áleýmettik jeliniń kúndelikti ómirimizge enýi turmys-saltqa aıtarlyqtaı ózgeris engizdi. Al qımyl-qozǵalystyń azdyǵy densaýlyq pen durys fızıkalyq damýǵa keri áser etedi. Sondyqtan búgingi jastardyń tynys-tirshiligin, qundylyqtaryn bilý maqsatynda «Jastar salamatty ómir salty úshin» jastar qoǵamdyq birlestigi áleýmettik saýalnama júrgizdi.

Zertteýge Petropavl jáne 13 aýdannan 8-11 synyp jáne kolledj oqýshylary, barlyǵy 4 703 respondent qatysty. Sonyń ishinde 65 %-y – qyzdar. Jaýap bergenderdiń jartysy – mektep oqýshylary. Jas erekshelikterine keler bolsaq – 13 pen 25 jas aralyǵyndaǵylar qamtyldy.

Jastarǵa ómirlik qundylyqtar boıynsha saýaldar qoıyldy. Respondentterdiń 91 %-y birinshi orynǵa áke-sheshesi men otbasyn qoıdy, ekinshi orynǵa densaýlyqty shyǵarsa, kelesi kezekke dostary sabaq jáne aqshany qoıdy. Sport, kóńil kóterý, mahabbat, kitap oqý, kompıýterlik oıyndar tómengi satydan kórindi.

70 %-dan astamy densaýlyqtaryn jaqsy jáne óte jaqsy dep baǵalaǵan. Zertteý nátıjesi suralǵandardyń 90 %-y óz densaýlyǵyn kútetinin kórsetti.

Salamatty ómir saltyn qalaı túsinesiń degen saýalǵa jastardyń basym kópshiligi esirtki qoldanbaý, araq-sharap ishpeý, temeki shekpeý, sportpen aınalysý jáne durys tamaqtaný dep jaýap bergen. Mamandar respondentterdiń salamatty ómir týraly túsinigi durys qalyptasqan jáne ony ustanady dep qorytyndy shyǵardy.

Jalpy SQO jastarynyń basym bóligi ózderin baqytty dep eseptep, ómirlerine kóńilderi toıady. Jańa bilim alýǵa ashyq, alaıda ony kitaptan, mektepten nemese ustazdan emes, ata-analarynan, áleýmettik jeliden qabyldaýǵa ázir.

Mamandar jastardyń psıhıkalyq jaǵdaıyna alańdaýshylyq bildirgen. Saýalnamadan ótken oqýshylar men stýdentterdiń arasynda ózin qolaısyz sezinetin, kóńil-kúıi bolmaıtyn ýaqyttyń jıi bolatynyn aıtqan. Oǵan oqý úlgeriminiń tómendigi, aqshanyń jetispeýshiligi, densaýlyqtyń nasharlyǵy, jalǵyzdyq, kelbetine kóńil tolmaýshylyq, ata-analardyń túsinispeýshiligi, ádiletsiz baǵa sebep bolady. Jastardyń 45,5 %-y belgili bir jaǵdaıda eshkimnen kómek suramaı óz máselelerin ózderi sheshýge tyrysatyndyqtaryn aıtqan. Olardyń arasynda psıhologtan, muǵalimnen kómek suraý keń taralmaǵan.