SQO túrmesine smartfon shokolad retinde kirgizilmek boldy

PETROPAVL. QazAqparat – Soltústik Qazaqstan oblysyndaǵy túzetý mekemesine ákelingen sálemdemelerdiń birinen uıaly telefon tabyldy. Baılanys quralyn shokolad retinde ótkizýge tyrysqan, dep habarlaıdy QazAqparat tilshisi.

SQO boıynsha Qylmystyq-atqarý júıesi departamenti baspasóz qyzmetiniń málimetinshe, ES-164/8 mekemesinde jazasyn ótep jatqan sottalýshyǵa berilgen sálemdemeni tekserý barysynda shokolad plıtkasynyń qaptamasyna oralǵan smartfon tabyldy.

Mekeme aýmaǵyna ótkizýgi tyıym salynǵan zatty tapqan qyzmetkerlerdiń aıtýynsha, sálemdeme jiberýshilerdiń tapqyrlyǵyna keıde tań qalmasqa bolmaıdy. Biraq olardyń aılasy iske aspaı jatady. Bul joly da uıaly telefondy jabysqaq lentaǵa jáne folgaǵa qos qabattap orap, ústine shokolad quıyp jasaǵan eken.

«Jazasyn óteýshilerge týystary kún saıyn sálemdeme ákeledi. Azyq-túlik, kıim jáne basqa da qajetti zattar salynǵan oramalar mekeme aýmaǵyna kirgizilmes buryn jiti tekseriledi. Sondyqtan da ruqsat etilmegen mundaı zattardy kirgizemiz dep áýre bolýdyń qajeti joq. Sálemdemelerdi jiberýshilerge tyıym salynǵan zattardy ishke kirgizýge tyrysqany úshin qylmystyq jáne ákimshilik jaýapkershilikke tartylatyny týraly eske salamyz», - deıdi SQO boıynsha QAJD bastyǵy Rýstan Ahmetjanov.

Sottalýshy shokoladta jasyrylǵan uıaly telefondy oǵan ázil retinde jıeni bergenin aıtty. Ákimshilik quqyq buzýshylyq faktisi boıynsha tıisti materıaldar jasalyp, odan ári sheshim shyǵarý úshin sotqa berildi.

Buǵan deıin SQO-da túrmege 8 uıaly telefondy kirgizbek bolǵandar ustalǵan edi. «Vaz 21099» markaly avtokóligimen Qostanaı oblysynan kelgen 4 adam 8 telefondy, zarıadtaý quraldary men sım kartalardy kolonııa aýmaǵyna laqtyrmaq bolǵan jerinen qolǵa tústi.