SQO turǵyny alaıaqtardyń nusqaýymen 6 bankten 8,5 mln teńge nesıe alǵan
SQO óńirlik kommýnıkatsııalar qyzmetinde ınternet alaıaqtyqpen kúres jáne 9 aıdyń qorytyndysyna arnalǵan brıfıng ótti.
SQO Polıtsııa departamenti Krımınaldyq polıtsııa basqarmasynyń aǵa jedel ýákili Jolaman Qumarbektiń aıtýynsha, sońǵy jyldary ınternet-alaıaqtyq qylmysy artyp keledi. 2019 jyly óńirde osyndaı 230 fakti tirkeldi, 2020 jyly - 495, 2021 jyly - 700, bıylǵy 9 aıda - 524 quqyq buzýshylyq tirkeldi, bul ótken jyldyń sáıkes kezeńimen salystyrǵanda 3,1 % az.
«QR qoldanystaǵy zańnamasyna sáıkes quqyq buzýshylyqtyń osy túrin jasaǵandarǵa 4 jylǵa deıin bas bostandyǵynan aıyrý, aýyr sanattaǵy quqyq buzýshylyqtar úshin 3 jyldan 7 jylǵa deıin bas bostandyǵynan aıyrý jazasy kózdelgen», - deıdi tártip saqshysy.
Mamannyń aıtýynsha, mundaı qylmystardy ashý jáne tergeý belgili bir qıyndyq týdyrady, óıtkeni ol transshekaralyq sıpatqa ıe, ıaǵnı qylmysker basqa oblys, elden bolýy múmkin. Sondaı-aq ınternet alaıaqtar túrli bank shottaryn, plastıkalyq kartalardy, sondaı-aq úshinshi tulǵalarǵa arnalǵan ár túrli abonenttik nómirlerdi paıdalanady. Quqyq buzýshylyqtyń osy túrin ashý maqsatynda zańnama aıasynda alynǵan barlyq derekterdi muqııat taldaý qajet, oǵan belgili bir ýaqyt qajet.
«Mundaı qylmystarǵa qarsy sharalardyń tıimdiligin arttyrý úshin respýblıkanyń basqa oblystarynyń, sondaı-aq basqa elderdiń osyndaı qylmystardy ashý men tergeýdegi tájirıbesi zerdelenýde. Ár túrli programmalyq-apparattyq keshenderdi qoldaný josparda bar. Bekitilgen qyzmetkerler turaqty negizde arnaıy oqytýdan ótedi. Zańnamany jetildirý jáne múddeli memlekettik organdarmen jáne kompanııalarmen ózara is-qımyl jasaý jóninde Іshki ister mınıstrligine usynystar joldanady», - deıdi Jolaman Qumarbek.
Polıtseıdiń aıtýynsha, alaıaqtyq jasaýdyń keń taraǵan tásiliniń biri - ózderin bank nemese polıtsııa qyzmetkeri retinde tanystyratyn jáne klıenttiń kartochkasymen kúdikti operatsııalar týraly esep beretin alaıaqtardyń qońyraýlary.
«Petropavl qalasynyń polıtsııa basqarmasyna oblys ortalyǵynyń turǵyny habarlasyp, alaıaqtarǵa jem bolǵanyn aıtqan. Áıeldiń uıaly telefonyna belgisiz adamdar qońyraý shalyp, ózderin bank qyzmetkeri dep tanystyrǵan jáne oǵan nesıe bergisi keletindigi týraly habarlaǵan. Osydan keıin qala turǵyny nusqaýlarǵa súıene otyryp, óz atyna 6 bankten qaryz rásimdegen. Keltirilgen shyǵyn somasy 8,5 mln teńge. Almaty qalasynda júrgizilgen jedel-izdestirý is-sharalary barysynda jasalǵan qylmysqa qatysy bar eki adam anyqtaldy. Olar 4 jáne 3,5 jylǵa bas bostandyǵynan aıyryldy», - deıdi Jolaman Qumarbek.
Tártip saqshysy alaıaqtan zardap shekken jaǵdaıda birden polıtsııaǵa habarlasýǵa keńes beredi. Kóbine ınternet- alaıaqtardyń quryǵyna egde jastaǵy adamdar túsedi, sondyqtan qylmystyń aldyn alý úshin týǵan-týys, tanystarmen túsindirý jumystaryn júrgizgen jón.
