SQO turǵyny órtengen úıden úsh balany aman alyp shyqty
PETROPAVL. KAZINFORM – Soltústik Qazaqstan oblysy Taıynsha qalasynda úsh balany qutqaryp qalǵan turǵyn marapattaldy.
Jeke turǵyn úıde órt túnde shyqqan. Sol kúni kezekshilikte bolǵan Aıdyn Aqanov úıdiń shatyrynyń lapyldap janyp jatqanyn baıqap qalady. Jedel qımyldap, kómekke umtylady.
Aýlaǵa kirgende, úıdiń kireberisi otqa oranyp úlgergen eken. Іshinen balalardyń aıqaılap, jylaǵan daýysy estildi.
Er adam oılanbastan terezeni syndyryp, qoıý tútin tolǵan bólmeden 2019, 2010 jáne 2009 jyly týǵan úsh qyzdy alyp shyqty. Batyl azamat olardy kórshi úıge jetkizip, qaýipsiz jerge ornalastyrdy. Abyroı bolǵanda, balalarǵa medıtsınalyq kómek qajet bolmady.
38 jastaǵy azamattyń bul erligi eskerýsiz qalmady. Órt kezinde úsh qyzdy qutqarǵan Aıdyn Aqanov SQO Tótenshe jaǵdaılar departamenti bastyǵynyń alǵys hatymen marapattaldy.
Sondaı-aq balalardy qutqarǵan batyrǵa aýdan ákimi, ózi jumys isteıtin «Roşınskoe 2016» JShS basshylyǵy jáne qoǵam ókilderi alǵys aıtyp, rızashylyqtaryn bildirdi.
Buǵan deıin SQO-da qyzyna pyshaq suǵyp alǵan áıeldiń alty jylǵa sottalǵanyn jazǵan edik.