SQO turǵyny áskerı kemelerdiń úlgilerin aınytpaı jasaıdy
PETROPAVL. KAZINFORM – Soltústik Qazaqstan oblysynyń turǵyny Andreı Komogaevtyń qolynan shyqqan áskerı keme úlgileriniń erekshiligi – mundaǵy ár bólshek erekshe yjdahatpen jasalǵan.

Bul bólshekterdiń keıbiri tipti sirińke basynan da kishkentaı. Sheber árqaısyn asqan dáldikpen berýge tyrysqan.

Búginde Andreı Komogaev úsh kemeni - nemis áskerı-teńiz flotynyń «Sharnhorst» aýyr kreıserin, Ulybrıtanııanyń «Hood» jelilik kemesin jáne japon flotynyń «Nagato» aýyr kreıserin qurastyrdy.

- Mundaı modelderdi jasaý – zor shydamdylyqty, uqyptylyqty jáne tehnıkalyq daǵdylardy qajet etedi. Jalpy óte kúrdeli protsess. Keme úlgisin jasaýǵa qaǵaz, karton, aǵash jáne metall qoldanylady. Al eń usaq bólshekter joǵary dáldikti jáne arnaıy quraldarmen jumys isteı bilýdi talap etedi. Bir modeldi qurastyrýǵa jasalý kúrdeliligine qaraı bir jyldan eki jylǵa deıin ýaqyt ketedi, - deıdi sheber.

Qazirgi ýaqytta Andreı Komogaev sheberhanasynda birneshe tarıhı kemeniń qurylysy qatar júrgizip jatyr. Olar - «Takao» atty japon flotynyń aýyr kreıseri, aty ańyzǵa aınalǵan «Bismarck» nemis lınkori, Reseı ımperatorlyq flotynyń «Pobeda» bronenostsy jáne «Mınsk» patrýldik zymyran kateri.

Andreı Aleksandrovıch Shal aqyn aýdanyndaǵy «Órken» óner mektebiniń pedagogy. 1998 jyldan beri eńbek etetin ol búginde joǵary biliktilik sanatyndaǵy ustaz.

- Shyǵarmashylyq – meniń ómirimniń ajyramas bóligi, súıiki isim. Bolashaqta qolymnan shyqqan keme modelderin kópshilik nazaryna usynyp, jeke kórme uıymdastyrǵym keledi. Bul joba meniń shákirtterime de úlken shabyt syılaryna senimim mol, - deıdi Andreı Komagaev.

Buǵan deıin SQO Aıyrtaý aýdany Konstantınovka eldi mekeninde 1941 jyly soǵysqa ketken jigittiń súıiktisine arnap tasqa qashap qaldyrǵan haty negizinde eskertkish paıda bolǵanyn jazǵan edik.