SQO shańǵy tebýden chellendj bastady
PETROPAVL. KAZINFORM – Soltústik Qazaqstan oblysy shańǵy tebý maýsymyn resmı ashyp, kórshi Qostanaı oblysyn chellendjge qatysýǵa shaqyrdy.
Oblystyń sport súıer qaýymy Aıyrtaý aýdanynyń Lobanovo eldi mekenine jınaldy. Óıtkeni osy ólkede halyqaralyq deńgeıdegi sport sheberi, túrli jarystardyń chempıony, shańǵyshy Samat Mýsın dúnıege kelgen. Qaıyńdy-qaraǵaıly ormanynyń arasynda shańǵy tebýge kelgenderdiń ishinde kásibı sportshylar da, belsendi demalysty unatatyn kári-jas ta bar.
- Búgin men alǵash ret aıaǵyma shańǵy baılap, júgirýge shyqtym. Jańa nárseni úırenýge eshqashan kesh emes. Jalpy búgingi is-shara arqyly shańǵy tebý maýsymyn ashyp qana qoımaı, salamatty ómir saltyn nasıhattaý úshin chellendjdi bastap otyrmyz. Qostanaıdaǵy dostarymyz, áriptesterimiz bizdi qoldaıdy degen úmittenemiz, - dedi oblys ákiminiń orynbasary Júsip Jumaǵulov.
SQO dene shynyqtyrý jáne sport basqarmasynyń málimetinshe, bıyl kóktemde óńir qostanaılyqtardan chellendjdi qabyldap, Petropavldaǵy Borkı kentinde 600 metrge shańǵymen júgirdi.
Jalpy óńirde buqaralyq sportpen 225 myńnan astam adam qamtylǵan. Nysandar qoljetimdi bolýy úshin tek bıyl 3 sport kesheni, sonsha hokkeı korty, 23 shaǵyn fýtbol alańy jáne 6 sport alańy paıdalanýǵa berildi.
Buǵan deıin SQO-da qysta qaıda demalýǵa bolatyndyǵyn jazǵan edik.