SQO polıtseıleri ınternet-alaıaqtyqtyń jańa ádisi týraly eskertedi
Qazaqstan turǵyndary úshin ınternet-alaıaqtyqtyń jańa tásiliniń qaýpi tónip tur. Qaskóıler iri banktiń belgili mobıldi qosymshasyn paıdalanýda. Jábirlenýshilerdiń barlyǵy mobıldi qosymshay arqyly salyq boıynsha nemese kommýnaldyq qyzmet tólemi úshin esep shottary týraly habarlamalar alǵan jáne olardy tólegen. Aqsha jalǵan kásipker retinde shotqa shyǵarǵan kıberqylmyskerlerdiń qaltasyna túsip otyrǵan.
Polıtseılerdiń aıtýynsha feık habarlamalardy ajyratý qıyn emes. Jalǵan habarlamalarda «satýshy» degen sóz bar, al salyq nemese kommýnaldyq qyzmet tólemderin alý quqyǵy bar uıymdardan keletin habarlamalarda ol sóz bolmaıdy. Shynaıy habarlamanyń sol jaǵynda uıymnyń logotıpi ornalasqan – alaıaqtarda logotıptiń ornyna esimniń ne teginiń birinshi árpi bolady. Alaıaqtar kórsetetin «QR Salyq AQ», «KAZtransGAZ AQ» jáne t.b. sııaqty uıym ataýlary naqty uıymdardyń ataýlaryna uqsas kóringenimen, tolyq sáıkes kelmeıdi.
Qylmyskerlerdiń esebi – adamdardyń basym bóligi tólemdi avtomatty túrde jasaýyna kózdelgen. Qaskóıler soltústikqazaqstandyqtardan 12 mıllıonnan astam teńgeni oljalaǵan.
«Qazirgi ýaqytta SQO Polıtsııa departamenti oblystyq bank fılıaly atyna aqparattyq hat joldady. Hatta alaıaqtardyń bankte tirkelý múmkindigin azaıtý boıynsha usynymdar kórsetilgen. Oblys turǵyndaryn saq bolýǵa shaqyramyz. Tólem jasaý týraly habarlama ala qalǵan jaǵdaıda, shyn túbirtektermen salystyryńyz. Kúmándansańyz, uıymǵa habarlasyńyz jáne habarlama joldaǵany ne joldamaǵany týraly naqtylap surańyz», – deıdi SQO PD Krımınaldyq polıtsııa basqarmasynyń bastyǵy Marat Jumalıev.
