SQO-nyń energetıkalyq kásiporyndaryna 550 maman qajet
PETROPAVL. KAZINFORM – Soltústik Qazaqstan oblysynyń ákimdiginde jylytý maýsymyna qatysty máseleler qaraldy.

SQO ákimdigi baspasóz qyzmetiniń málimetinshe, oblysty jylýmen 2 Jylý-elektr ortalyǵy, 24 ortalyq qazandyq jáne 466 avtonomdy qazandyq qamtamasyz etedi. Petropavldaǵy stantsııada 8 qazandyq pen 6 týrbına agregaty jumys isteıdi, rezervte 2 qazandyq pen 1 týrbına bar. Bir qazandyqty kúrdeli jóndeý bastaldy. Sondaı-aq bıyl jańa murjany iske qosý josparlanǵan. Sonymen qatar qatty tasqynnan zardap shekken 53 shaqyrym joǵary voltty elektr jelileri men 737 baǵana qalpyna keldi.
Jambyl, Jumabaev, Tımırıazev, Ýálıhanov jáne Shal aqyn aýdandarynda 7 blok-modýldik qazandyq ornatyldy. Bul 20 kópqabatty úı men 2 áleýmettik nysanǵa turaqty jylý berýdi qamtamasyz etti. Sondaı-aq Presnovkada 2 kópqabatty úı men 7 áleýmettik nysan qosyldy. Aýdandarda 7 qazandyq almastyryldy.
Kelesi jylytý maýsymynda Saýmalkól jáne Novoıshım aýyldarynda ortalyq qazandyqtar men jylý jelilerin iske qosý josparlanǵan, Talshyq aýylynda da jylý jelileri qosylady. Sonymen qatar Jumabaev, Músirepov jáne Tımırıazev aýdandarynda jańa blok-modýldik qazandyqtar ornatylady.
Jıynda sondaı-aq energetıka salasyndaǵy maman tapshylyǵy máselesi de kóterildi. Qazir energetıkalyq kásiporyndarda 550 bos jumys orny bar. Ásirese, elektrmonterler, elektr ustalary, ınjenerler men dánekerleýshiler jetispeıdi. Osyǵan baılanysty, «Jumysshy mamandyqtary jyly» aıasynda aımaq basshysy Ǵaýez Nurmuhambetov oqý oryndaryn oblysqa qajetti mamandardy daıarlaýǵa qaıta baǵdarlaýdy tapsyrdy.
Buǵan deıin SQO-da qoqys úıindilerin joımaǵan aýyldyq okrýgterdiń 9 ákimi jazalanǵanyn jazǵan edik.