SQO-nyń burynǵy turǵyny aýylyna 64 mln teńgege saıabaq salyp berdi
PETROPAVL. KAZINFORM – Soltústik Qazaqstan oblysynyń shalǵaı jatqan Kóbensaı aýylynda endi Tyń ıgerýshiler saıabaǵy bar.
Bir gektarǵa jýyq aýmaqty alyp jatqan bul saıabaq eldi meken turǵyndarynyń súıikti demalys oryndarynyń birine aınaldy. Aınalasyna jasyl jelek otyrǵyzylyp, gúlmen kómkerildi, oryndyqtar qoıyldy. Jaıly júrginshiler joldary, balalarǵa arnalǵan qaýipsiz oıyn alańy jabdyqtaldy.
SQO ákimdiginiń málimetinshe, bul joba Ýálıhanov aýdanynyń qurmetti azamaty, metsenat Vıktor Vovktyń qoldaýymen júzege asyp, 64 mln teńgege salyndy.
Vıktor Vovk – Kóbensaı aýylynyń týmasy, belgili dáriger, Qazaqstannyń Densaýlyq saqtaý isiniń úzdigi jáne 50-den astam ǵylymı eńbektiń avtory.
Jas kezinde Almatyǵa qonys aýdarǵanymen, kindik qany tamǵan aýylyn umytqan emes. Eldi mekenniń kórkeıýine óz úlesin qosyp keledi. Máselen sońǵy jyldary onyń qarjylaı qoldaýymen mekteptiń sportzaly jóndelip, jańa taqtalar ornatyldy. Bilim ordasynyń aýmaǵyn asfalttap, shaǵyn fýtbol alańyn salyp berdi. Tyńaıǵan jerlerdi ıgerýdiń 60 jyldyǵyna oraı eskertkish taqta ornatyp, mektepke, shaǵyn ortalyqqa jáne medıtsınalyq pýnktke jańa tehnıka, jabdyqtar jetkizdi, sý qubyryn tartty. Qazir aýyl turǵyndary tis emdeý úshin aýdan ortalyǵyna barmaıtyn bolǵan, aýylda zamanaýı stomatologııalyq kabınet jumys isteıdi.
Buǵan deıin Atyraý metsenattary qalamgerlerdiń kitabyn shyǵarýǵa demeýshilik jasaǵanyn jazǵan edik.