SQO-nyń 42 aýyly sapaly aýyzsýmen qamtamasyz etiledi
PETROPAVL. KAZINFORM – Sý resýrstary jáne ırrıgatsııa mınıstrligi SQO-nyń 4 aýdanyndaǵy 22 myń turǵyndy aýyz sýmen qamtamasyz etetin úsh jańa sý júıesin iske qosty.
Memleket basshysynyń tapsyrmasyna sáıkes, Sý resýrstary jáne ırrıgatsııa mınıstrligi SQO-nyń 42 aýylyn sapaly aýyzsýmen qamtamasyz etý jobalaryn merziminen buryn aıaqtady.
Sý resýrstary jáne ırrıgatsııa mınıstri Nurjan Nurjigitov pen Soltústik Qazaqstan oblysynyń ákimi Ǵaýez Nurmuhambetov óńirdiń tórt aýdanyndaǵy 22 myń aýyl turǵynyn taza aýyz sýmen qamtamasyz etýge arnalǵan úsh jańa sý júıesin iske qosý rásimine qatysty.
Mınıstrlik toptyq sý qubyrlaryn rekonstrýktsııalaý jáne salý boıynsha eki jobany josparlanǵan merzimnen 1,5 jyl buryn aıaqtady. Taǵy bir joba aıaqtalýǵa jaqyn.
Qazirgi tańda Taıynsha jáne Aqjar aýdandaryndaǵy eldi mekenderdi ortalyqtandyrylǵan sýmen jabdyqtaý maqsatynda Býlaev toptyq sý qubyrynan sý tartý tarmaqtaryn salý boıynsha eki joba tolyq júzege asyryldy.
Taıynsha aýdanyndaǵy 13 aýyldy aýyz sýmen qamtamasyz etý úshin jalpy uzyndyǵy 170 shaqyrym bolatyn sý qubyry men sorǵy stantsııasy salyndy. Qurylys-montaj jumystary 2025 jyldyń sáýirinde bastalyp, qazan aıynda aıaqtaldy. Al bastapqy jobada qurylys merzimi eki jyl dep josparlanǵan bolatyn.
Býlaev toptyq sý qubyrynyń jańa sý tartý tarmaqtaryna qosylǵan Taıynsha aýdanynyń aýyldary buryn-sońdy ortalyqtandyrylǵan aýyz sý júıesine qosylǵan emes. Buǵan deıin bul eldi mekender sýdy uńǵymalardan, qudyqtar men blok-modýlderden alyp kelgen. Endi turǵyndar sýdy úılerine tikeleı tarta alady.
Aqjar aýdanynda Býlaev toptyq sý júıesinen uzyndyǵy 123 shaqyrym bolatyn sý tartý jelileri salyndy. Bul joba da eki jylǵa eseptelgen edi. Buǵan deıin bul aýyldarda da sý uńǵymalar men qudyqtardan alynyp kelgen. Alaıda sýdyń sapasyna qatysty suraqtar bolǵandyqtan jergilikti turǵyndar ony turmystyq maqsatta paıdalana almaǵan.
Aıaqtalýǵa jaqyn turǵan úshinshi joba Kókshetaý toptyq sý qubyrynan jalpy uzyndyǵy 220 shaqyrym bolatyn sý tartý jelilerin salýdy kózdeıdi. Bul jeliler Soltústik Qazaqstan oblysynyń Aıyrtaý jáne Shal aqyn aýdandaryndaǵy 24 aýyldy qamtıdy. Qazirgi tańda merdiger uıym negizgi jumystardy tolyq oryndap, sý qubyrlaryn iske qosý jumystary júrgizilip jatyr.
Bul eldi mekender buǵan deıin ortalyqtandyrylǵan aýyz sý júıesine qosylǵan emes. Sý tartý jelileri salynǵanǵa deıin 24 aýyl da sýdy uńǵymalardan, qudyqtar men blok-modýlderden alyp kelgen.
— Jańa sý qubyrlary sapaly aýyzsýdy úılerge deıin jetkizýge múmkindik beredi. Bul aýyldarda mundaı júıe buryn-sońdy bolmaǵan. Sý júıeleriniń qurylysy aýyl turǵyndarynyń ómir súrý sapasyn edáýir jaqsartyp, kásipkerlik pen aýyl sharýashylyǵyn damytýǵa negiz qalaıdy. Memleket basshysynyń qazaqstandyqtardy aýyz sýmen 100 paıyz qamtamasyz etý jónindegi tapsyrmasyn oryndaý maqsatynda bıyl barlyq úsh jobany aıaqtaý úshin qajetti sharalar qabyldandy. Qazirgi ýaqytta mınıstrlik 950 myńnan astam adamdy aýyz sýmen qamtý úshin 2,4 myń shaqyrymnan astam sý qubyryn salý jáne rekonstrýktsııalaý jumystaryn júrgizip jatyr. Sondaı-aq eldiń 9 óńirinde 29 joba júzege asyrylyp jatyr, — dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik Sý resýrstary salasynda ÚEU-men yntymaqtastyqty damytýǵa arnalǵan jańa keńes quryldy.