SQO kelgen dárigerlerge beriletin kótermeaqy mólsherin eki ese arttyrdy

SQO-nyń emdeý mekemeleri bıyl 200 mamanmen tolyqty. Soltústik Qazaqstan oblysynda qarasha aıynan bastap kelgen dárigerlerge beriletin bir rettik kótermeaqy mólsheri ósti. Endi bilikti maman aýylǵa barǵan jaǵdaıda 5 mln, Petropavlda qalǵan jaǵdaıda 3,5 mln teńge alady, dep habarlaıdy Kazinform.

Sáýir Toqtarbaı - Astana medıtsınalyq ýnıversıtetiniń túlegi. SQO oblysy ákiminiń grantymen rezıdentýrada anestezıolog-reanımatolog mamandyǵyn aldy. Petrınataldyq ortalyqta jumys istep jatqanyna 3 aı boldy.

«Maǵan bul jer unaıdy, tııanaqty jumysty, jaýapkershilikti talap etedi. Ujym da jaqsy qarsy aldy. Búgin densaýlyq saqtaý basqarmasy 3,5 mln teńge, oblystyq aýrýhana 3 mln teńge kótermeaqy berdi. Budan bólek aýrýhana aı saıyn 50 myń teńge jalǵa alǵan páterimizdiń aqshasyn tóleıdi. Qazir dárigerler úıinen páter alýǵa kezekte turmyn. Oblysta bes jyl isteýge mindettimin. Otbasym bar. Zaıybym da medıtsına qyzmetkeri, qazirgi ýaqytta Nazarbaev ýnıversıtetinde bilim alyp jatyr», - deıdi jas maman. 

Reanımatsııa bólimshesinde 9 anestezıolog-reanımatolog jumys isteıdi. Onyń tórteýi sońǵy eki jylda qatarǵa qosyldy. 

«Jas mamandardyń kelgenine qýanyshtymyz, olar jańashyldyqqa, bilmekke qushtar. Óıtkeni anestezıologııa-reanımatsııa bir orynda turmaıtyn sala», - deıdi bólimshe meńgerýshisi Dınara Rahmetova.

Bıyl SQO-da medıtsınalyq qyzmetkerlerge beriletin kótermeaqy ósti. Buryn aýylǵa barsa 2,5 mln, qalada qalsa 1,5 mln teńge alatyn. Endi eldi mekendi tańdaǵandarǵa 5 mln, Petropavlǵa kelse 3,5 mln teńge berilip jatyr. 

«201 dáriger keldi, 133-i bir rettik kótermeaqy aldy. Ol úshin dáriger ótinish berýi tıis, keıin komıssııa qarap, sheshim shyǵarady. SQO boıynsha kadr jetispeýshiligi máselesi osylaısha sheshimin taýyp jatyr. Qazirgi ýaqytta 140 maman jetispeıdi. Byltyr 280 dáriger kerek bolatyn. Bul problema kótermeaqy mólsherin arttyrý nátıjesinde sheshilip jatyr. Sondaı-aq eger erli-zaıyptynyń ekeýi de dáriger bolsa, páter aqysyn tolyq tólenedi. Tek bireýi ǵana medıtsına qyzmetkeri bolǵan jaǵdaıda 50% ótep beremiz», - deıdi SQO densaýlyq saqtaý basqarmasy basshysynyń orynbasary Nurjan Taǵanııazov. 

Basqarma ókiliniń aıtýynsha, dáriger aýylǵa barǵan jaǵdaıda jergilikti ákimdik úımen qamtıdy. Emdeý mekemeleri ózderi de qosymsha qarjylaı qoldaıdy.

«Byltyr elimizdegi alty medıtsınalyq ýnıversıtet túlekterimen kezdestik. Nátıjesinde jastarǵa bizdiń usynysymyz unap, kelip jatyr. Qazirgi ýaqytta akýsher-gınekologtar, kardıologtar, onkologtar jáne hırýrgtar kerek. Jergilikti bıýdjet esebinen qazirgi ýaqytta 30 rezıdent bilim alyp jatyr. Kelesi jyly oblystyq bıýdjet esebinen bilim alǵan 50 maman oqý bitirip keledi», - deıdi Nurjan Taǵanııazov.