SQO: Internet alaıaqtyqtan turǵyndarǵa 920 mln teńge shyǵyn kelgen

PETROPAVL. KAZINFORM – Soltústik Qazaqstan oblysynda ınternet alaıaqtyq barlyq qylmystyń 22 % alyp otyr. Qolǵa alynǵan keshendi sharalardyń nátıjesinde polıtseıler ony shamaly bolsa da - 1,2% azaıta aldy.

SQO Polıtsııa departamentiniń bastyǵy Aıdyn Qabduldınovtyń aıtýynsha, kıberqylmys, ásirese sońǵy eki jyldyń ishinde kúrt artqan.

«Internet tehnologııany qoldaný arqyly jasalǵan alaıaqtyq faktileri kúndelikti tirkeledi. Byltyr 1017 alaıaqtyq jasalsa, sonyń 771-inde turǵyndar ınternet arqyly aldanyp qalǵan. 920 mln teńgeden astam shyǵyn shekti, sonyń tek 37 mln teńgesin ǵana qaıtarý múmkin boldy», - deıdi Aıdyn Qabduldınov.

Departament bastyǵynyń aıtýynsha, mundaı qylmystardy ashý óte qıyn. Óıtkeni, adamdar aldanǵanyn kesh túsinedi, ıaǵnı kesh habarlasady. Qylmyskerler kóbine shet elde otyryp ózderiniń aram oılaryn iske asyrady.

«Aldyn alý úshin qazir eńbek ujymdarynda da kezdesýler ótkizip jatyrmyz. Tipti úıdi-úıdi aralap, adamdarmen kezdesip, ásirese zeınetkerlermen sóılesip, qylmystyń osy túri jaıynda aqparattandyramyz, broshıýralar taratamyz. Bul jumysqa BAQ ókilderin, volonterlerdi tarttyq. Byltyr 825 adam «102» arnasyna telefon shalyp, ózderine alaıaqtardyń habarlasqanyn, olardyń talaptaryn oryndamaǵandaryn aıtqan. Qoǵamdyq damý jáne aqparat mınıstrligine alaıaqtardyń jalǵan jarnamalaryn buǵattaý úshin byltyr 900-den astam silteme jiberildi», - deıdi Aıdyn Qabduldınov.