SQO halqy qajetti kómirmen 90 paıyz qamtylǵan

PETROPAVL. QazAqparat – Soltústik Qazaqstan oblysynyń turǵyndary jylytý maýsymyna qajet kómirmen 90 %-ǵa qamtyldy. Tuıyqtarda túrli markaly kómirdiń 26 tonnasy jatyr, dep habarlaıdy QazAqparat tilshisi.

SQO-nyń qoǵamdyq keńesi jylytý maýsymynyń ótý barysyn pysyqtady.

Jaýapty vedomstvo – SQO energetıka jáne turǵyn úı-kommýnaldyq sharýashylyǵy basqarmasynyń málimetinshe, jaǵdaı qalypty, jylytý maýsymy qalypqa saı ótip jatyr.

Basqarma basshysynyń mindetin atqarýshy Evgenııa Ostrovskaıanyń aıtýynsha, oblysta barlyǵy 490 qazandyq bar, onyń 24-i – ortalyq qazandyq.

«Bıýdjettik mekemelerge qajetti kómir der kezinde – jazǵy ýaqytta jetkizildi. Qajettilik – 141 myń tonna. Al turǵyndar bir qysta 419 myń tonna kómir paıdalanady. Onyń 90%, ıaǵnı 376 myń tonnasyn jetkizip aldy. Kómirge qatysty másele joq. Tuıyqtarda 26 myń tonnasy jatyr, sonyń ishinde 1,3 myń tonnasy Petropavlda. Qazir 2450 tonna Qarajyra, 1330 tonna Shubarkól, 1470 tonna Maıkóbe jáne 350 tonna Ekibastuz kómiri jolda kele jatyr», - deıdi Elena Ostrovskaıa.

SQO-da kómirdiń baǵasy markasyna qaraı tonnasyna 10 myń teńge men 17,5 myń teńge aralyǵynda.

«Jylytý maýsymynyń ótý barysyna basqarma kúndelikti monıtorıng jasap otyr. Sondaı-aq tuıyqtardaǵy kómirdiń mólsheri de qadaǵalaýda», - dedi basqarma basshysynyń mindetin atqarýshy Elena Ostrovskaıa.