SQO-ǵa tasqynmen kúreske kelgen qutqarýshylar búgin úılerine attandy
PETROPAVL. KAZINFORM — Soltústik Qazaqstan oblysyna sý tasqynymen kúreske basqa óńirlerden kelgen Tótenshe jaǵdaılar mınıstrliginiń bólimsheleri búgin úılerine qaıtty.
«Kúshimiz birlikte!» dep atalǵan saltanatty is-shara Petropavldaǵy ortalyq kóshelerdiń birinde ótti. Bul rásimge TJM basshysy Shyńǵys Árinov, quqyq qorǵaý organdarynyń, áskerı qurylymdardyń basshylary, osy kúnderi bel jazbaı jumys istegen qutqarýshylar, áskerı qyzmetshiler men volonterler, memlekettik qyzmetshiler jáne jurtshylyq qatysty.
Sońǵy apta oblys úshin asa kúrdeli ótti. Teplıchnoe, Prıbrejnoe eldi mekenderin jáne Zarechnyı kentin sý basýyna jol bermeý úshin jigitter táýlik boıy, qolaısyz aýa raıyna qaramastan jumys istedi. Kómekke TJM, Astana qalasynyń, Aqmola, Qaraǵandy, Qostanaı oblystarynyń qutqarýshylary, M.Ǵabdýllın atyndaǵy Azamattyq qorǵanys akademııasynyń kýrsanttary, TJM 28237, 52859 áskerı bólimsheleriniń sarbazdary — barlyǵy 700±ge jýyq adam keldi. Bul eńbek nátıjesin berdi. Olardyń eńbegi nátıjesiz bolǵan joq — atalǵan eldi mekenderde turǵyn úılerge sý kirgen joq. Qazirgi tańda óńirdegi jaǵdaı turaqtalyp keledi.
— Qutqarýshylar kúrdeli sý tasqyny kezeńinde kómekke kelip, óńirimiz úshin senimdi tirek boldy. Olar táýlik boıy, tizeden muzdaı sýda turyp, daýyl men sýyqqa qaramastan, bógetterdi bekitip, aýyldar men adamdardy saqtap qaldy. Soltústikqazaqstandyqtardyń atynan árbir qutqarýshyǵa rızashylyǵymdy bildiremin.
Sondaı-aq, jigitterdiń ata-analary ben otbasylaryna shyn júrekten alǵys aıtamyn. Olardyń tárbıesi arqasynda elimizde osyndaı batyl, rýhy myqty, naǵyz qorǵaýshylar ósip shyqty. Kásibılik, tózimdilik pen adamgershilikterińiz úshin raqmet, — dedi SQO ákimi Ǵaýez Nurmuhambetov.
Bul kúni, sondaı-aq 32 adamdy Shyńǵys Árinov marapattady. Olardyń segizine vedomstvolyq medaldardy, qalǵanyny alǵys hattardy tabys etti. Óńir basshysy da óz atynan 32 adamdy marapattady.
Kómekke kelgen bólimsheler is-shara sońynda kolonna qurap, úılerine attandy.
Esterińizge salaıyq, SQO-da sý tasqyny bastalǵaly 148 adam, sonyń ishinde 24 bala evakýatsııalanǵanyn jazǵan edik.