SQO-ǵa tasqynmen kúreske alǵashqy kómek kelip jetti

PETROPAVL. KAZINFORM — Soltústik Qazaqstan oblysyna búgin kóktemgi tasqynmen kúreske Qaraǵandy oblysynan 50 adam kelip jetti.

Qyzyljar aýdany ákimi apparatynyń jumyldyrý daıyndyǵy, aýmaqtyq qorǵanys jáne azamattyq qorǵaý jónindegi bas ınspektory Erkebulan Asylbekovtiń aıtýynsha, kelgender QR Tótenshe jaǵdaılar mınıstrliginiń Qaraǵandy oblysyndaǵy áskerı bólimshesiniń mamandary. Búgin olardy Beskól aýylyndaǵy Soltústik Qazaqstan aýyl sharýashylyǵy ǵylymı-zertteý ınstıtýty ǵımaratyna ornalastyrdy. 

— Kómekke jetken qaraǵandylyq áriptester ózderimen birge 5 aýyr tehnıkany ala keldi. Olar qazir bógetti nyǵaıtýǵa kómektesip jatyr. Bıiktetilgen bógetti shaıyp ketpeý úshin polıpropılen qaptamany jaýyp, bekitedi. Ázirge TJM basqa bólimderinen kómektiń qashan keletinin aıta almaımyz, sý tasqyny jaǵdaıyna baılanysty sheshim qabyldanady, — deıdi Erkebulan Asylbekov.

Mamannyń aıtýynsha, qazir Qyzyljar aýdanynda QR Ulttyq ulanynyń 60 kýrsanty eńbek etip jatyr. Olar Beskól, Prıbrejnoe jáne Teplıchnoe eldi mekenderinde qaptarǵa qum toltyryp jatyr. 

Sondaı-aq CQO-da kóktemgi sý tasqyny qarsańynda gıdroposttarda josparly baqylaý bastaldy.