SQO-ǵa ońtústikten kóship barǵan turǵyn grant alyp, naýbaıhana ashty

PETROPAVL. QazAqparat – Bıyl 2021-2025 jyldarǵa arnalǵan kásipkerlikti damytý jónindegi ulttyq joba sheńberinde Soltústik Qazaqstan oblysy boıynsha kásipkerlik bastamalardy damytýǵa 274 grant berý josparlanǵan, dep habarlaıdy QazAqparat Eńbek jáne halyqty áleýmettik qorǵaý mınıstrligine silteme jasap.

Búginde óńirde 178 adam memleketten qoldaý aldy. Ulttyq jobaǵa qatysýshylardyń biri – Aqjar aýdanynyń turǵyny Darıha Qurbanova. Ol 1 380 000 teńge kóleminde memlekettik grant alyp, Voshod aýylynda óz naýbaıhanasyn ashty.

Men otbasymmen Soltústik Qazaqstan oblysyna ótken jyldyń qyrkúıek aıynyń sońynda, ońtústikten soltústikke qonys aýdarý baǵdarlamasy boıynsha kóship keldim. Oblys ákimdigi maǵan memlekettik qoldaýdyń barlyq sharalaryn usyndy, kóshýge sýbsıdııa tóledi, turǵyn úımen qamtamasyz etti. Sonymen qatar, bıznesti damytý úshin qaıtarymsyz grant týraly da egjeı-tegjeıli túsindirdi. Grant – óz kásibin bastamaıtyndar úshin keremet qoldaý

, - deıdi Darıha Qurbanova.

Ol sondaı-aq, qasyna kómekshi alǵanyn jáne bolashaqta óz bıznesin keńeıtýdi josparlap otyrǵanyn aıtty.

Esterińizge sala keteıik, 2023 jyly bıznes-ıdeıalardy iske asyrý úshin barlyǵy 9 000 grant berý josparlanyp otyr. Bul rette, osy jyldyń basynan bastap 5 317 grant berildi.

Business.enbek.kz portaly arqyly jańa bıznes-ıdeıalardy iske asyrý úshin memlekettik granttar alýǵa ótinishterdi qabyldaýdyń úshinshi legi qyrkúıek aıyna josparlanyp otyr. Tıisti habarlandyrý ótinishterdi qabyldaý bastalǵanǵa deıin kúntizbelik 10 kún buryn Eńbek jáne halyqty áleýmettik qorǵaý mınıstrliginiń jáne halyqty jumyspen qamtý máseleleri jónindegi organdardyń resmı ınternet-resýrstarynda jarııalanady. Portal arqyly ótinish qabyldaý merzimi – ár lekte 10 jumys kúni.