SQO: Ǵ.Músirepov atyndaǵy aýdanda 54 aýyldyń turǵyndary qatynap baryp daýys berdi
SQO-da búgin aýyl ákimderiniń saılaýyna 218 eldi mekenniń 60 myńnan astam turǵyny qatysyp jatyr. Ǵabıt Músirepov atyndaǵy aýdanda saılaý ýchaskesi joq 54 aýyl turǵyndary saılaýǵa qatysýy úshin arnaıy kólik uıymdastyryldy.
Oblystaǵy eń shalǵaı jatqan aýyldyq okrýg te osy aýdanda ornalasqan. Qyrymbet aýyldyq okrýgi men aýdan ortalyǵy – Novoıshımkanyń ara qashyqtyǵy – 170 km.
Sondaı-aq aýyldyq okrýgter arasynda saılaýshylary eń kóp aýyldyq okrýg te osy aýdanǵa tıesili. Bolashaǵy zor Nejınka aýyldyq okrýginde búgin 1941 adam daýys berip jatyr.
Jalpy aýdanda búgin 3 aýyldyq okrýgte turǵyndar aýyl ákimderin saılap jatyr. Saılaýǵa 9 kandıdat túsken. 3 úmitker partııalardan jáne 6 kandıdat ózin ózi usynǵandar.
«Ǵ.Músirepov atyndaǵy aýdannyń 3 aýyldyq okrýgynda 2462 saılaýshy bar. Saılaýdyń ádil ótýi baıuqaýshylardyń nazarynda. Eshqandaı zańbuzýshylyqtar tirkelgen joq. Barlyq ýchaskelerde sanıtarlyq normalar saqtalǵan», - deıdi Ǵ.Músirepov atyndaǵy aýdandyq saılaý komıssııasynyń tóraǵasy Nursadyq Baraqaev.
