SQO-daǵy uıym-kásiporyndarda qazaq tilin oqytatyn 300-ge jýyq úıirme jumys isteıdi
«Qazaq tili» qoǵamynyń oblystyq fılıalynyń keńeıtilgen alqa májilisi Halyqaralyq ana tili kúnine oraılastyryldy.
«Til – rýhanı muramyzdy saqtaý men damytýdyń eń kúshti quraly. ıÝNESKO-nyń málimetinshe, álemniń shamamen 6 myń tiliniń jartysy jaqynda joıylýy múmkin. Memlekettik tilge degen qajettilikti arttyrý búgingi kúni ortaq mindetimiz. Halyqaralyq «Qazaq tili» qoǵamy elimizde osy baǵytta aýqymdy jumystardy atqarýǵa mindettep otyr. Oblystyq fılıal alǵash ret osyndaı is-shara ótkizip jatyr», - dedi jıynǵa qatysqan SQO ákiminiń orynbasary Ǵanı Nyǵymetov.
SQO mádenıet, tilderdi damytý jáne arhıv isi basqarmasy basshysynyń mindetin atqarýshy Nurlan Jamantaevtyń aıtýynsha, óńirde til saıasatyn iske asyrýdyń 2020-2025 jyldarǵa arnalǵan memlekettik baǵdarlamasy tıimdi júzege asyp jatyr. Oblystyq tilderdi oqytý ortalyǵy arqyly oqytylatyn tyńdaýshylar qatary jyl saıyn artyp keledi. 2020 jyly 114 qazaq jáne 22 aǵylshyn tili tobynda 2 400-ge jýyq adam oqyǵan. Byltyr 140 topta – 2474 adam: 124 - qazaq, 16 – aǵylshyn tilin meńgergen. Al bıyl 3008 adamdy qamtyǵan 142 top qurylmaq, onyń 127-si qazaq tilin oqytady. Osy maqsatqa 20 mln teńge bólindi.
«Tyńdaýshylardyń quramynda qarapaıym turǵyndar, memlekettik qyzmetshiler, quqyq qorǵaý organy qyzmetkerleri, turǵyndarǵa memlekettik qyzmet kórsetý mekemeleriniń, densaýlyq, bilim, mádenıet jáne sport salasy qyzmetkerleri bar. Oblys aýdandarynda jáne Petropavlda jergilikti bıýdjet qarajatyna eresek turǵyndardy oqytatyn qosymsha 71 top uıymdastyryldy, sonyń 61-i qazaq toptary. Sonymen qosa, oblystyń uıym, kásiporyndarynda 266 úıirmede 3800-den astam tyńdaýshy qazaq tilin meńgerip jatyr», - deıdi Nurlan Jamantaev.
Mamannyń aıtýynsha, ótken jyldyń qorytyndysy boıynsha memlekettik organdarda qazaq tilindegi qujattardyń úles salmaǵy 94,9 %-dy qurady. Alaıda, qujattardy aýdarý barysynda negizinen kompıýterlik aýdarma qoldanylady, bul aýdarmanyń sapasyna áser etedi eken.
