SQO-daǵy daý: kásiporyn tabyssyz, adamdar jumyssyz qala ma
Onyń sebebin kásiporyn qyzmetkerleri quqyq qorǵaý organdarynyń óndirilgen ónimdi satýǵa kedergi keltirýimen baılanystyrýda. Birneshe jyldan beri jalǵasyp kele jatqan daýǵa sot ta núkte qoıa almaı otyrǵan syńaıly, dep habarlaıdy QazAqparat.
Aıta ketsek, Obýhov Qazaqstandaǵy ǵana emes, álemdegi biregeı ken orny. Munda tıtan tsırkonıı kontsentraty óndirilip, ónim eksporttalady. Málimetterge qaraǵanda, bul elimizdegi osy ónimdi shyǵaratyn jalǵyz zaýyt eken.
Toqtala ketetin jaıt, jaqynda quqyq qorǵaý organdary ónim tasymaldaý kezinde alynǵan, ıaǵnı satýǵa jiberilgen kontsentratty tárkilengen. Zaýyt basshysy bul tárkileýdi zańsyz dese, kombınat qyzmetkerleri tárkilengen ónimniń ózi durys saqtalmaǵanyna narazylyǵyn aıtyp jatyr.
«Tsırkonıı kontsentratyn saqtaýdyń ózine tán talaptary bar. Al tárkilengen ónim sol talapqa saı saqtalmaýda. Osyǵan deıin biz qaptardy bir-biriniń ústine 2 qatar qoıǵanyn kórdik. Ara qashyqtyq ta joq. Saqtalatyn jer qurǵaq bolýy kerek. Osynyń barlyǵy buzylǵan. Demek ónim endi jaramsyz. Ony eshkim almaıdy. Al shyǵyndy kim óteıdi? Quqyq organdary saqtaý erejelerin bilmeıdi ǵoı», - dedi Obýhov taý-ken baıytý kombınatynyń geologi Irına Kaldıntsova.
«Obýhov taý-ken baıytý kombınaty» JShS dırektory Danıl Dolgalevtyń sózine qaraǵanda, 2020 jyldan beri kásiporynnan 500 tonna ónim tárkilendi. «Tárkilengen ónimniń jalpy quny - 250 myń AQSh dollary. Qazirgi ýaqytta onyń qaıda ekeni de belgisiz. Saqtalýyna eshkim kepildik bermeıdi. Quqyq qorǵaý organdary Obýhov taý-ken baıytý kombınaty óz ónimin syrtqa shyǵarmaýy kerek degen ustanymda. Alaıda, bizdiń ónimge sotpen eshqandaı shekteý qoıylǵan joq qoı», deıdi seriktestik basshysy.
Osy máselege quqyq qorǵaý organdarynyń da óz pikiri bar. Daýǵa baılanysty jergilikti prokýratýra da, ishki ister organdarynyń basshylary zaýyt jumysshylarymen birneshe ret kezdesken. Biraq ázirshe esh nátıje shyqpaǵanǵa uqsaıdy. Sonymen qatar, negizi ken óndiretin oryn «Tıolaın» atalatyn seriktestikke qaraıdy eken. Al sot sheshimi boıynsha onyń múlkin syrtqa shyǵarýǵa bolmaıdy. Al taý-ken baıytý kombınaty bul bizdiń qyzmetke kedergi keltirmeýi kerek degen pikirde. Osy jerde kombınat pen quqyq qorǵaýshylardyń pikiri qaıshy bolyp tur. Óıtkeni, Taıynsha aýdandyq prokýratýrasynyń málimetinshe, sot oryndaýshysynyń qyzmetin júzege asyrýy sottyń birinshi satysynda zańsyz dep tanyldy. Alaıda prokýratýra appelıatsııalyq sotqa júgingen. Sondyqtan, prokýratýra qazirgi ýaqytta is qaıta qaralyp jatqanyn, sottyń sheshimi shyqqan soń ǵana, naqty birdeńe aıtýǵa bolatynyn alǵa tartady.
Degenmen, «Tıolaın» kompanııasynyń ókilderi bul seriktestikti bankrot qylyp, sheteldikterge satý úshin qasqana istelip otyrǵan áreket deıdi. Tergeý de sol sebepti negizsiz uzaqqa sozylýda. Al taraptar teketiresiniń saldarynan kásiporyn toqtap, adamdar jumyssyz qalýy múmkin.
