SQO-daǵy áıelder kolonııasyndaǵy ár besinshi sottalǵan adam óltirgeni úshin otyr
SQO QAJD baspasóz qyzmetiniń málimetinshe, áıelder kolonııasynda jazasyn ótep jatqandardyń ár besinshisi adam óltirgen. Sondaı-aq negizinen alaıaqtyq, qaraqshylyq, esirtki taratý jáne urlyq úshin sottalady.
Darıa esimdi áıel kúıeýimen 30 jyl turǵan. Birde úıdegi kezekti urys-janjaldyń sońy tóbeleske ulasyp, Darıa as bólmesindegi pyshaqty kúıeýiniń keýdesine suǵyp alady. Alǵan jaraqattan er adam sol jerde qaza tabady.
Sotta Darıa óz kinásin tek ishinara ǵana moıyndady. Óltiretin oıy bolmaǵanyn aıtty. Kúıeýimen 30 jyl bir shańyraq astynda turǵanyn, janjalǵa qaza tapqannyń qyzǵanyshy sebep bolǵanyn jetkizdi.
Oqıǵa bolar kúni keshke olar qaıtadan ursysqan. Al túnde er adam áıeline kóńildesimen ustap alǵan jaǵdaıda ony óltiretinin aıtqan. Tańerteń janjal jalǵasyp, arty tóbeleske ulasqan. Zardap shegýshi as bólmesine baryp, pyshaqtar salynǵan shkafqa umtylǵan. Artynan ilese barǵan áıeli ústel ústinde turǵan pyshaqty alyp úlgerip, onyń búıirine suǵyp alǵan. Kúıeýi ólgennen keıin ulyna telefon shalyp, kórshisine baryp ýchaskelik ınspektordy shaqyrǵan.
Sotta Darıa Nıkolaıdy óltirgisi kelmegenin, ózin qorǵamaq bolǵanyn aıtty.
«Biz onymen 30 jyl turdyq. Іshimdikke qumar boldy. Qanshama ret ishpe, zııan dep aıttym. Biraq onyń bári qur beker boldy. Bul oqıǵa meniń týǵan kúnimde boldy. Bári qas-qaǵym sátte boldy, ózim de túsinbeı qaldym. Birden ulyma, ýchaskelik ınspektorǵa jáne jedel járdem qyzmetine telefon shaldym. Alaıda jedel járdem keshigip jetti. Sońǵy aılarda onymen birge turý adam tózgisiz boldy. Ol sózben qaǵytyp, únemi qorlyq kórsetti. Qyzǵanyshy birinshi orynda turdy. Kóshege shyǵyp, jurtpen sóılesýden qaldym. Shydamym shegine jetti. Ol óziniń qyzǵanyshymen meni osyndaı jaǵdaıǵa jetkizdi. Qazir nege men onymen sonshama jyl turdym dep oılaımyn. Ómirdi kórgen joqpyn, al ómir óte shyqty. Ómirim qorqynyshpen ótti. Óıtkeni ol meni tastap ketseń óltiremin, basqamen turmaısyń dedi. Qyzǵanyshqa sebep bergen joqpyn. Onyń zorlyq-zombylyǵyna tózbeýim kerek edi, sonda bári basqasha bolar ma edi», - deıdi sottalǵan Darıa.
Darıanyń jazasyn ótep jatqanyna bıyl tórtinshi jyl.
«Túsken kezde tuıyqtalyp, ózi, otbasy jaıynda aıtqysy kelmeıtin. Boıyn qorqynysh bılep, mazasyz kúı keshti. Alaıda psıhologtyń mindeti jazasyn óteýshige ótkendi oı eleginen ótkizip, ári qaraı ómir súrýge degen qulshynysyn oıatý. Jumysymyz óz nátıjesin berdi. Qazir onyń kóńil-kúıi jaqsy, bolashaqqa qurǵan josparlary bar. Balalarymen baılanysty úzgen joq», - deıdi ES-164/6 mekemesiniń psıhology Gúljan Seksembaeva.
Darıany bostandyqta anasy, balalary, nemereleri asyǵa kútip otyr.
«Iıa, meniń kinám bar, odan bas tartpaımyn. Meni «qastyqpen ádeıi óltirý» baby boıynsha 8 jylǵa sottady. Onyń jartysyn ótedim. Týǵan-týystarymmen Skype jáne telefon arqyly habarlasyp turamyn, kezdesýge keledi. Olardyń barlyǵy meni jaqsy kóredi jáne bosap shyǵýymdy kútip júr», - deıdi jazasyn óteýshi Darıa.
