SQO-daǵy sý tasqyny baqylaýda: Bozymbaev ahýaldy baǵalady
ASTANA. KAZINFORM — Qanat Bozymbaev Soltústik Qazaqstan oblysynda sý tasqynynyń ekinshi tolqynynyń ótý barysyn tekserdi. Bul týraly Úkimettiń baspasóz qyzmeti málim etti.
Jumys sapary barysynda Premer-mınıstrdiń orynbasary Qanat Bozymbaev Sergeev sý qoımasynyń, Ýşev bógetiniń jáne Petropavl gıdrotorabynyń tehnıkalyq jaǵdaıymen tanysyp, Esil ózeni boıyndaǵy eldi mekenderdi áýeden sholyp ótti: Nıkolaevka, Pokrovka, Chırıkovka, Semıpalatnoe, Bogolıýbovo, Beskól, Prıbrejnoe, Kojevennyı, Podgora, Zarechnyı, Olshanka, Sokolovka, Bolshaıa Malyshka.
Vıtse-premer M. Jumabaev aýdanynyń Býlaevo qalasynda Orman órt sóndirý stantsııasynyń jumysymen tanysty. Odan keıin Teplıchnoe jáne Prıbrejnoe aýyldaryna baryp, qorǵanys bógetterin tekserdi.
Oblys ákimdiginiń málimetinshe, sý tasqyny qaýpi bar 112 eldi meken baqylaýda. Olardyń qaýipsizdigin jalpy uzyndyǵy 105,4 km bolatyn 60 bóget qamtamasyz etedi. Petropavl qalasynda eki bógetti qaıta jańǵyrtý jumystary aıaqtaldy (Kojevennyı kenti, Ýşev kóshesi). Qyzyljar aýdanynda bıoprýd jáne jalpy uzyndyǵy 24,4 km bolatyn úsh bóget boıynsha jobalar aıaqtalýǵa jaqyn. Úkimet qoldaýymen Prıbrejnoe jáne Teplıchnoe aýyldarynda temirbeton jabyndysyn tóseý arqyly qorǵanys bógetin qaıta jańǵyrtýdyń negizgi jumystary aıaqtaldy. Qazirgi ýaqytta abattandyrý jumystary júrgizilip jatyr. Bolshaıa Malyshka aýylynda uzyndyǵy 3,9 km bolatyn jer biligi salyndy jáne qosymsha nyǵaıtyldy. Prıbrejnoe aýylyna aparatyn uzyndyǵy 2,1 km joldy qaıta jańǵyrtý jáne kópir salý jumystary bastaldy, Sokolovka aýyly mańynda Esil ózeniniń arnasy túzetildi. Zarechnyı kenti turǵyndaryn josparly túrde kóshirý jalǵasýda — 90 otbasy jańa turǵyn úımen qamtamasyz etildi. Mamyr aıynda 72 páterli turǵyn úı qurylysy aıaqtalady, bıyl taǵy bir osyndaı úıdiń qurylysy bastalady.
— Joǵary táýekel aımaǵynda Ǵabıt Músirepov atyndaǵy, Shal aqyn, Esil, Qyzyljar aýdandary jáne Petropavl qalasy qalyp otyr. Qazirgi ýaqytta sý tasqynynyń ekinshi tolqynynyń sharyqtaý shegi Ǵ. Músirepov jáne Shal aqyn aýdandarynda ótýde, al Petropavl qalasynda 30 sáýir-2 mamyr aralyǵynda boljanyp otyr, — dep habarlady Úkimetten.
Muz keptelisteriniń aldyn alý maqsatynda 24 myń sharshy metrden astam aýmaqta jarylys jumystary júrgizildi. 23,6 myń tonna ınertti materıal jáne 549 myń qap daıyndaldy. 2 223 adamnan, 1428 tehnıkadan, 476 sý sorǵysh jáne 120 júzý quralynan turatyn kúshter men quraldar daıyn. Jalpy syıymdylyǵy 15,5 myń adamǵa arnalǵan 283 ýaqytsha ornalastyrý pýnkti ázirlendi.
Sý rejımine táýlik boıy monıtorıng 27 gıdrologııalyq beket arqyly júrgizilýde. Oblystyń negizgi sý arterııasy — Esil ózeni 12 gıdrobeket arqyly baqylaýda. 24 sáýirdegi jaǵdaı boıynsha Sergeev sý qoımasynyń tolymdylyǵy 120,58% (kólemi 835,6 mln tekshe metr). Sý deńgeıi — 139,16 sm, tasý deńgeıi — 116 sm (táýligine +12 sm). Petropavl gıdrotorabyndaǵy sý deńgeıi 93,08 sm (táýligine -12 sm).
Búgingi kúnge deıin turǵyn úılerdi sý basý derekteri tirkelgen joq. Sý tasqyny kezeńi bastalǵaly beri respýblıkalyq, oblystyq jáne aýdandyq mańyzy bar avtomobıl joldarynda 4 sý asý faktisi tirkeldi, alaıda eldi mekenderge qaýip tóngen joq.
Óńirdegi ahýal turaqty baqylaýda, barlyq qyzmetter ózara úılesimdi jumys istep jatyr. Qabyldanǵan saqtyq sharalary turǵyndardyń qaýipsizdigin jáne sý tasqyny kezeńiniń birqalypty ótýin qamtamasyz etýde. Sý tasqyny kezeńi mamyr aıynyń basyna qaraı qalypty deńgeıde aıaqtalady dep kútiledi.
Eske sala keteıik, buǵan deıin Premer-Mınıstrdiń orynbasary Qanat Bozymbaev jumys saparymen Abaı oblysyna barǵan edi. Óńir ákimi Berik Ýálımen, Tótenshe jaǵdaılar jáne Sý resýrstary jáne ırrıgatsııa mınıstrlikteriniń basshylyǵymen birlesip, sý tasqyny qaýpi bar aýmaqtarǵa monıtorıng júrgizildi.