SQO-daǵy kólderdiń birinde balyq qyryldy

PETROPAVL. KAZINFORM – Soltústik Qazaqstan oblysy Esil aýdanyndaǵy Solenoe kólinde balyq qyryldy. Qazirgi ýaqytta sý jándikteriniń neden ólgenin anyqtaý úshin sýdyń jáne balyq óleksesiniń synamasy zertteýge jiberildi.

Solenoe kóli Esil aýdany Pokrovka eldi mekeniniń mańynda ornalasqan. Balyqtyń qyrylǵanyn aýyl turǵyndary baıqap, beınejazbaǵa túsirip alǵan. Aıtýlarynsha, ólgen balyqta esep joq. 

SQO ekologııa departamenti baspasóz qyzmetiniń málimetinshe, osy fakti boıynsha múddeli memlekettik organdardan quralǵan top sý aıdynynyń aýmaǵynan jáne ólgen balyqtan synama alý jáne tekserý úshin jumys istep jatyr. Nátıjesin qosymsha habarlamaq. 

SQO tabıǵı resýrstar jáne tabıǵat paıdalanýdy retteý basqarmasy málim etkendeı, Solenoe kólin «Chekýnov» jeke kásipkerligi jalǵa alǵan. Sý aıdyny 58 ga aýmaqty alyp jatyr. Ortasha tereńdigi 1-2 metrden aspaıdy. 

Buǵan deıin SQO-da 53 mekteptiń oqýshylary sý tasqynyna baılanysty qashyqtan bilim alyp jatqanyn aıtqan edik.