SQO-da jyl sońyna deıin kásip bastaýǵa 268 grant berilmek

PETROPAVL. QazAqparat – Soltústik Qazaqstan oblysynda bıyl jastarǵa jáne halyqtyń áleýmettik áljýaz toptaryna bıznes-ıdeıalaryn júzege asyrýǵa 653 grant – 827 mln-ǵa jýyq teńge bólingen. Onyń jartysynan astamy ıgerildi, dep habarlaıdy QazAqparat tilshisi.

SQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Rınat Eljasovtyń aıtýynsha, búginge deıin 425 mln teńgeniń 385 granty berildi. Úlestirilgen aqshanyń ortasha somasy 1,1 mln teńge shamasynda.

«Granttyń basym bóligi aýyl sharýashylyǵyn damytýǵa berildi. 236 granttyń 226-syn óńir turǵyndary mal satyp alýǵa jumsamaq. 10 adam eginshilikpen aınalysady. Ekinshi orynda qyzmet kórsetý tur, sonyń ishinde 21 adam saýdamen aınalyspaq, 11 adam tehnıkalyq qyzmet kórsetý ornyn ashady, 10 turǵynqurylys jáne jóndeý jumystaryn qolǵa almaq. Grant alǵandardyń 38-i óz ónimin shyǵarýdy maqsat etip otyr, onyń ishinde azyq-túlik te, aǵash-temir buıymdary da bar», - deıdi Rınat Eljasov.

Jyl sońyna deıin 400 mln teńgeniń 268 granty berilmek. Qazirgi ýaqytta grantty kimge berý qajettigin jergilikti jerlerdegi komıssııa sheshedi. Mamandar bıznes-ıdeıalardyń básekege qabiletti bolýyn, ómirsheńdigin, tıimdiligin, bıznes jobany júzege asyrý barysynda ekonomıkalyq oıǵa qonymdylyǵyn eskeredi.

«Jyl saıynǵy taldaý granttardyń keı ýaqytta maqsatsyz jumsalatynyn kórsetip otyr. 2018-2022 jyldar aralyǵynda 9,9 mlrd teńgeniń 2 901 granty berilgen. Onyń 0,4 % nemese 36 mln teńgesi qaıtarylýy kerek. Bul somanyń 9,2 mln teńgesi sot arqyly qaıtaryldy», - deıdi Rınat Eljasov.