SQO-da jyl basynan bıýdjetke 75,6 mln teńge múlik salyǵy esebinen túsken

PETROPAVL. QazAqparat – Soltústik Qazaqstan oblysynda menshik quqyǵy bar 170 myńnan astam turǵyn bar, olar bıyl bıýdjetke 75,6 mln teńge múlik salyǵyn tólegen, dep habarlaıdy QazAqparat tilshisi.

SQO boıynsha Memlekettik kirister departamentiniń málimetinshe, múlik salyǵyn menshiginde turǵyn úı, ǵımarat, garaj, basqa da qurylystar jáne jer ýchaskesi bar jeke tulǵalar tóleıdi. Óńirde olardyń sany 170 myńnan asady. Bul turǵyndardyń menshiginde 300 myńnan astam nysan bar.

«1 qazan kúni 2020 jyldyń múlik salyǵyn tóleý merzimi aıaqtalady. Qańtar-tamyzda bıýdjetke 75,6 mln teńge tústi. Bıyl salyq zańnamasyna engen ózgeristerge baılanysty menshik ıeleri burynǵydaı jer ýchaskesi jáne jyljymaıtyn múlik úshin eki bólip tólemeıdi, ol biriktirilip otyr. Salyq tóleýshiler poshta arqyly eskertilip jatyr. Múlik salyǵy boıynsha qaryzdyń bar-joǵyn kgd.gov.kz servısi, «E-salyq Azamat» mobıldi qosymshasy nemese Kaspi.kz jáne Homebank qosymshalary arqyly bilip, tóleýge bolady», - deıdi SQO boıynsha Memlekettik kiris departamentiniń túsindirý jumystary basqarmasynyń basshysy Natalıa Nekrasova.

Mamannyń aıtýynsha, kóligi bar turǵyndar da salyq tóleý qajettigin umytpaýlary kerek. Jyl basynan avtokólik ıelerinen bıýdjetke 943,8 mln teńge túsken. Onyń 525 mln teńgesi aldyńǵy jyldardyń salyǵy. Qazirgi ýaqytta 11 myń soltústikqazaqstandyq kólik salyǵy boıynsha 311 mln teńge qaryz. Onyń ishinde aldyńǵy jyldardan qalǵan bereshekte bar.