SQO-da jyl basynan beri 54 ınternet alaıaqtyq deregi tirkeldi
SQO polıtsııa departamenti krımınaldyq polıtsııa basqarmasynyń bastyǵy Marat Jumalıevtiń aıtýynsha, jeltoqsan aıynyń sońynda Petropavl turǵyny polıtsııaǵa shaǵymdanyp, belgisiz bireýdiń onyń atyna 2 mln teńge nesıe rásimdegenin aıtqan.
Telefonmen sóılesken kezde alaıaq oǵan ózin bank qyzmetkeri retinde tanystyryp, bireýlerdiń nesıe alýǵa tyrysyp jatqanyn, buǵan jol bermeý úshin telefonǵa «Anıdesk» dep atalatyn arnaıy baǵdarlamany júkteý kerektigin aıtqan.
Jábirlenýshi nusqaýlardy oryndap, baǵdarlamany júktep, barlyq suraǵan aqparatty belgisiz adamǵa telefon arqyly habarlaǵan.
Osydan keıin alaıaq óz qurbanynyń banktik shottaryna qashyqtan qol jetkizip, birazdan keıin 2 mln teńge somasyna nesıe resimdegen.
Taǵy bir turǵyn onyń atyna nesıe resimdelgenin sot oryndaýshylary habarlasqanda ǵana bilgen.
«Petropavl turǵynynyń aıtýynsha, ol eshkimge jeke derekterin bermegen jáne nesıe almaǵan. Jedel-izdestirý is-sharalary barysynda oblys ortalyǵynyń 34 jastaǵy turǵyny anyqtaldy. Ol jaýap alý barysynda kinásin moıyndady. Er adam aýrýhanalardyń biriniń janynan ótip bara jatyp, bir áıeldiń jeke derekteri bar medıtsınalyq anyqtamasyn taýyp alǵan. Aqsha kerek bolǵandyqtan ınternet arqyly áıeldiń atyna onlaın nesıe resimdemek bolady. Birneshe áreketten keıin uıymdardyń bireýi oǵan nesıe bergen», - deıdi Marat Jumalıev.
Polıtseıdiń aıtýynsha, SQO-da ınternet-alaıaqtyqtyń eń kóp taralǵan túrleri: bank qyzmetkerleriniń jalǵan qońyraýlary, tanymal jarnama saıttarynda taýarlarǵa tapsyrys berýý jáne az aqsha salý arqyly mol qarajat alý.
«Internet alaıaqtar jaqsy daıyndyqtan ótken, adam psıhologııasyn biledi, sóz arasynda bank termınderin qoldanady, áńgime barysyn aldyn ala josparlaıdy. Sondyqtan belgisiz berýler qońyraý shalǵan jaǵdaıda birden telefon tutqasyn qoıǵan jón. Internet arqyly taýar alǵanda tanymal saıttardy tańdaǵan jón. Aldyn ala tólem surasa, bul sizdiń kúdigińizdi týdyrýy qajet.
Taǵy bir eskeretin jaıt, bankomattan aqsha alǵannan keıin nemese tólem termınaldary arqyly operatsııa júrgizgen soń túbirtekterdi qaldyrmaý kerek. Óıtkeni kóbine chekterde azamattardyń uıaly telefon nómiri, JSN nómirleri bolýy múmkin. Sondyqtan saqtyq retinde túbirtekterdi joıyp nemese alyp ketken jón», - deıdi Marat Jumalıev.
