SQO-da jyl basynan beri 119 adam enterobıozben aýyrǵan
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, enterobıozdy las qol aýrýy dep te ataıdy. Keń taralǵan parazıttik aýrýlardyń biri. Enterobıozdyń qozdyrǵyshtary - adamnyń ishekterinde paıda bolǵan 3-12 mm aq gelmınt-qurttar.
«SQO-da bıylǵy 7 aıda enterobıozdyń 119 jaǵdaıy tirkeldi, onyń 93,2 %–y - 14 jasqa deıingi balalar. Byltyr 85 adamǵa osy dıagnoz qoıyldy.
Enterobıoz balalardaǵy birqatar somatıkalyq aýrýlardyń jıi paıda bolýyna jáne sozylmaly patologııanyń órshýine yqpal etedi. Parazıttik aýrý balalar men eresekterden taraıdy. Qurt jumyrtqalary dezınfektsııalyq zattarǵa óte tózimdi. Tósek-oryndarda, oıynshyqtarda, kilemderde, vanna bólmeleri men dárethanalarda 25 kúnge deıin ómirsheń bolýy múmkin. Infektsııa juqtyrǵannan keıin onyń belgileri 12-14 kún ishinde paıda bolady», - deıdi oblystyq sanıtarııalyq-epıdemıologııalyq baqylaý departamentiniń ınfektsııalyq jáne parazıttik aýrýlardy epıdemıologııalyq baqylaý bóliminiń basshysy Saltanat Bekqojına.
Mamannyń aıtýynsha, enterobıozben aýyratyn balanyń anýs aımaǵy qyshyp, túnde uıqysy buzylady. Perıanaldy aımaqty qaraý kezinde teriniń qyzarýy, jergilikti titirkenýi jáne tyrnalýy, keıde – ekzema jáne sýlanǵysh dermatıt bolýy múmkin.
«Qurt jumyrtqalary tyrnaqtyń astyna túsip, balalar saýsaqtaryn sorý, tyrnaqtaryn tisteý, aýzyna oıynshyqtar salý kezinde aýyz arqyly ishke túsedi. Eń basty sebebi - gıgıena erejelerin elemeý, balalar mekemeleri men úıde sanıtarlyq normalardy saqtamaý.
Enterobıozben aýyrǵan balalardyń tábeti tómendep, ishi qatýy nemese kerisinshe ishi ótýi múmkin. Іshi keýip, júregi aınıdy, qusady. Aryp, balanyń ósýi men damýyna keri áser etedi», - deıdi Saltanat Bekqojına.
Enterobıozdy emdeý jáne gıgıenalyq sharalardy saqtaý balalardy qurt aýrýynan qutqarady. Alaıda, ınfektsııa úıde tolyq joıylmaǵan jaǵdaıda qaıta aýyrý qaýpi bar.
«Enterobıoz las qol aýrýy bolyp sanalatyndyqtan, balalarǵa erte jastan bastap gıgıena daǵdylaryn úıretý qajet. Balanyń tyrnaqtaryn qysqa kesip, dárethanadan keıin, tamaqtanar aldynda, serýendeýden keıin qoldy sabyndap jýýdy daǵdylandyrý. Tańerteń jáne keshke balany jýyndyryp, ish kıimderin kúndelikti aýystyryp turý, saýsaqtaryn sorýǵa jáne tyrnaqtaryn tisteýge tyıym salý, tósek-oryndardy jıi aýystyryp, kókónister men jemisterdi qoldanar aldynda muqııat jýý qajet», - deıdi sanıtar dáriger.