SQO-da júrgizýshi kýáligin «satqan» alaıaq sottaldy

PETROPAVL. QazAqparat – Soltústik Qazaqstan oblysynda 16 adamdy aldap, emtıhansyz júrgizýshi kýáligin alyp berem degen alaıaq sottaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, alaıaqtyq jasady degen kúdikpen jazda Kókshetaý qalasynyń 35 jastaǵy turǵyny ustaldy.

Ol emtıhansyz júrgizýshi kýáligin áperem dep 16 adamdy taqyrǵa otyrǵyzǵan. Zardap shekkender - SQO men Aqmola oblysynyń turǵyndary.

«Ol buryn osyndaı qylmystar jasaǵany úshin sotty bolǵan. Alaıda er adam túzelmeı, baıaǵy ádetine basqan. Alaıaq adamdarǵa Astanada tanystary baryn aıtyp, emtıhan tapsyrmaı-aq aqshalaı syıaqyǵa júrgizýshi kýálgin alýǵa bolatynyn aıtqan. Sonymen qatar ózine júgingen alǵashqy qurbandarynan olardyń tanystary da ońaı jolmen júrgizýshi kýálikterin alǵysy kelmeı me ekendigin bilýdi suraǵan», - deıdi polıtseıler.

Osylaısha alaıaqtyń qarmaǵyna Taıynsha aýdanynyń 14 turǵyny, Aqjar aýdanynan 1, Kókshetaý qalasynan 1 adam ilikken.

Zardap shekkender er adamǵa aqsha aýdaryp, ózderine, jubaılary men balalaryna da júrgizýshi kýáligin alý úshin tapsyrys bergen.

SQO polıtseıleri alaıaqty anyqtap, 16 epızod boıynsha materıaldy sotqa tapsyrdy.

Jábirlenýshilerge keltirilgen shyǵynnyń somasy 1,5 mıllıon teńgeden astam.

Sot qaskóıdi 3 jylǵa bas bostandyǵynan aıyrýǵa úkim shyǵardy.

Tártip saqshylarynyń aıtýynsha, sońǵy kezderi alaıaqtyqtyń osyndaı túri órshigen: Petropavlda 3 fakti tirkeldi.

Polıtseıler belgilengen protsedýralardy aınalyp ótip alǵan qujat zańsyz bolyp tabylatynyn eske salady jáne kúmándi usynystarǵa senbeýge shaqyrady.