SQO-da júk tasymaldaýshylar «Bıdaıyq» ótkizý pýnktinde elektrondy kezek engizilýine qarsy
Soltústik Qazaqstan oblysynyń kásipkerler palatasyna Aqjar jáne Ýálıhanov aýdandarynyń júk tasymaldaýshylary shaǵymdandy. Kásipkerler «Bıdaıyq» avtomobılderdi ótkizý pýnktinde elektrondyq kezektiń engizilýge qarsy. Másele Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń otyrysynda qaraldy, dep habarlaıdy Kazinform.
Buǵan deıin «Bıdaıyq» avtomobılderdi ótkizý pýnktinde CarGoRuqsat elektrondy kezegi iske qosylǵanyn aıtqan edik. Pılottyq joba Reseımen shekarada kólikterdiń bir ýaqytta jınalyp, keptelisin boldyrmaý, osylaısha jurttyń ýaqytyn únemdeý maqsatynda engizilgen.
Alaıda bul jańashyldyq júk tasymaldaýshylarynyń kóńilinen shyqpady.
«Tasymaldaýshylar osy pılottyq joba engizilgeli shekaradan ótýde qıyndyq paıda bolǵanyn aıtyp otyr. Óz kezegin brondaý úshin saıtta tirkelý kerek, júrgizýshi men kólik týraly málimetterdi engizý, shekaradan ótýdiń qolaıly kúnin tańdaý qajettiligi týyndady. Alaıda Aqjar men Ýálıhanov aýdandarynda ınternet nashar. Sondaı-aq tasymaldaýshylar atap ótkendeı, bul ótkizý pýnktinde keptelis bolǵan emes, munda kólik óte az júredi», – deıdi SQO Kásipkerler palatasynyń kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl bóliminiń basshysy Aıdos Keńbeıilov.
SQO boıynsha Memlekettik kirister departamenti ókilderiniń aıtýynsha, «Bıdaıyq» ótkizý pýnktinde kólik az ótedi. Sol sebepti pılottyq jobanyń artyqshylyǵyn, jetildiretin tustaryn baıqaý úshin tańdap alynǵan.
«Shyn máninde, bul pılottyq joba Ózbekstanmen, Qytaımen shekaralarda iske qosylǵan, qalypty jumys istep tur. Internetke keletin bolsaq, siz kezekke kem degende bir aı nemese birneshe kún buryn úıden nemese kez kelgen jerden tapsyrys bere alasyz. Salyq eseptiligin tasymaldaýshylar onlaın tapsyrady ǵoı, sondaı-aq kezekke de kez kelgen kúni belgili bir ýaqytqa tapsyrys berýge bolady. Elektrondyq kezek bir táýlik boıy kúshin joǵaltpaıdy», - dedi SQO boıynsha Memlekettik kirister departamenti basshysynyń orynbasary Damır Nurǵalıev.
Tasymaldaýshylar munymen kelispeıdi. Tapsyrys kez kelgen ýaqytta túsip, júkti jedel túrde aparý qajettigi týady. Sondyqtan aldyn ala josparlaý múmkin emes. Budan basqa, tasymaldaýshylar úshin elektrondyq kezektiń engizilýimen shekarany bir kesip ótkeni úshin 1 AEK mólsherinde jańa tólem paıda bolady. Ol keler jyly 1 qańtardan bastap qoldanysqa enbek.
«Ýálıhanov aýdanynda 200 tasymaldaýshy-jeke kásipker bar. Biz Reseımen 200 km sheginde jumys isteımiz. ıAǵnı shekaradan kúnine 1-2 ret ótemiz, ıaǵnı kórshi aýyl barǵan sııaqty. Pılottyq joba aıyna bir nemese eki ret shekaradan ótetin halyqaralyq tasymaldaýshylar úshin qolaıly dep sanaımyz. Olar bir ret shekaradan ótip, mln teńge tabady. Al biz osy somanyń jartysyn tabý úshin 20 ret barýymyz kerek. 1 qańtardan bastap jol júrý aqyly bolady – shekaradan bir ótý úshin 1 AEK tóleý qajet. Tabysy 1 mln teńgeden asatyn júk kóligi bir ret ótip, 3450 teńge tóleıdi, al biz 20 ret ótip, 69 myń teńge tóleýimiz kerek. Kimge? Ne úshin? Ózimizdiń memlekettik shekarany kesip ótkenimiz úshin aqy tóleýdi kim oılap tapty?» - dep jeke kásipker Aqylbaı Ibragımov renishin bildirdi.
Memlekettik kirister departamenti ókilderiniń aıtýynsha, «CarGoRuqsat» boıynsha túsken tólem shekaranyń ınfraqurylymyn damytýǵa jumsalmaq. Biraq bul tólem Salyq kodeksinde kórsetilmegen. Jańa tólem jáne onyń mólsheri jazylǵan normatıvtik aktige Sybaılas jemqorlyqqa qarsy is-qımyl agenttiginiń SQO boıynsha departament ókilderi de qyzyǵýshylyq tanytty.
Mamandardyń aıtýynsha, qazirgi ýaqytta «Bıdaıyq» shekara beketi arqyly kúnine orta eseppen 20-30 mashına ótedi. Onyń aıtýynsha, kezekti brondaý kezinde eshqandaı problema joq, 5 mınýt ishinde «oryn alýǵa» bolady. Al nashar ınternet máselesin sheshý úshin qosymsha Wi-Fi marshrýtızatorlary satyp alynǵan.
Tasymaldaýshylardyń ótinishterin qaraý barysynda kásipkerlerdiń quqyqtaryn qorǵaý jónindegi keńes músheleri eki mańyzdy problemany anyqtady. Birinshisi - osy pılottyq jobanyń oryndalýyn qamtamasyz etetin tıisti ınfraqurylymnyń joqtyǵy: tehnıkalyq daıyndyqtyń álsizdigi, ınternettiń nashar ustaýy, tasymaldaýshylardyń elektrondyq brondaý týraly habardar bolmaýy, operator arqyly ózine-ózi qyzmet kórsetý termınaldary arqyly kezekti brondaý balamasynyń bolmaýy.
Ekinshi másele – memlekettik shekaradan ótý úshin aqy alý jáne onyń zańdylyǵy. Osy máselelerdiń barlyǵyn ýákiletti organdar qysqa merzimde qarap, anyqtaý kerek. Nátıjesinde elektrondyq kezekti engizý qajet. Biraq aldymen memlekettik organdar osy jobany iske asyrmas buryn oǵan qajetti jaǵdaı jasaýy kerek degen qorytyndyǵa keldi.
