SQO-da JRVI-men aýyrǵandar sany azaıdy

PETROPAVL. KAZINFORM — Soltústik Qazaqstan oblysynda JRVI-men syrqattanýshylyq sharyqtaý sheginen ótip, juqtyrǵandar sany bir aptada 33% tómendedi.

SQO sanıtarııalyq-epıdemıologııalyq baqylaý departamentiniń málimetinshe, sońǵy bir aptada JRVI-di juqtyrýdyń 1,1 myń jaǵdaıy tirkeldi. Jalpy, qazan aıynan beri óńirde jedel respıratorlyq vırýstyq ınfektsııalardy juqtyrǵan 42 myńǵa jýyq adam dárigerge kóringen. Bul ótken epıdmaýsymmen salystyrǵanda 7% tómen. Ótken jyly osy kezeńde 45 myńǵa jýyq jaǵdaı tirkelgen. Aýrýǵa shaldyqqandardyń basym bóligi 14 jasqa deıingi balalar bolyp otyr. ıAǵnı, jalpy syrqattanǵandardyń ishindegi olardyń úlesi — 27 myń. 

Sondaı-aq, bıylǵy epıdmaýsymda A/H3N2 tıpti tumaýdy 207 adam juqtyrdy. Onyń ishinde 78-i — 14 jasqa deıingi balalar, al qalǵan 129-y — eresekter.

Mamandardyń aıtýynsha, dene qyzýynyń kóterilýi, jalpy álsizdik, tamaqtyń aýyrýy jáne murynnyń bitelýi — jedel respıratorlyq vırýstyq ınfektsııalar men tumaýdyń negizgi belgilerine jatady. Mundaıda ózdiginen em qabyldaýǵa bolmaıdy. Mindetti túrde medıtsınalyq kómekke júginip, qajet bolǵan jaǵdaıda dárigerdi úıge shaqyrǵan jón.

Aýrýdyń uzaqqa sozylýy túrli asqynýlarǵa ákelýi yqtımal. Sonyń ishinde eń qaýiptisi — pnevmonııa. Sondyqtan dárigerler aýrý belgilerine beıjaı qaramaı, der kezinde em qabyldaýdyń mańyzdylyǵyn eskertedi.

Buǵan deıin Qyzylorda oblysynda JRVI-diń 72,5 myńnan astam jaǵdaıy tirkelgenin jazǵan edik.