SQO-da jerge ýly hımıkat tókken sharýashylyqqa aıyppul salyndy

PETROPAVL. KAZINFORM – Soltústik Qazaqstan oblysy Shal aqyn aýdanyndaǵy «Asyl Farms» JShS-ge qatysty ekologııalyq tekseris aıaqtaldy. Hımıkatpen qorshaǵan ortaǵa zııan keltirgen sharýashylyq topyraq qabatyn qalpyna keltirý boıynsha keshendi jumys júrgizedi. 

Byltyr mamyr aıynyń sońynda Shal aqyn aýdany Afanasevka eldi mekeniniń mańyndaǵy ormanda aǵash japyraqtary sarǵaıyp ketken. Muny kórgen turǵyndar áleýmettik jelide shý shyǵaryp, nátıjesinde tekseris júrgizilgen edi.

Ekologtardyń aıtýynsha, «Asýl Farms» JShS-gi Sergeev orman sharýashylyǵy mańynda KAS-32 suıyq tyńaıtqyshyn tókken. Alaıda bul týraly tıisti mekemelerge habarlamaǵan.

«Apat jaıynda, keltirilgen ekologııalyq shyǵyn týraly oblystyń qorshaǵan ortany qorǵaý boıynsha ýákiletti organyna habarlaýy kerek edi. Mindetti memlekettik ekologııalyq saraptama týraly QR zańnamasy buzylǵan. Bul zań buzýshylyqtar boıynsha JShS ákimshilik jaýapkershilikke tartylyp, 1 mln 121 myń teńge aıyppul salyndy. Sondaı-aq olqylyqtardy joıýǵa uıǵarym berildi», - deıdi SQO boıynsha ekologııa departamentiniń basshysynyń mindetin atqarýshy Jasulan Sádýev.

Sharýashylyq topyraq qabatyn bastapqy qalpyna keltirý boıynsha remedıatsııa baǵdarlamasyn jasady. Keshendi shara barysynda jerdiń qunarlyǵyn qaıtarý úshin rekýltıvatsııanyń tehnıkalyq jáne bıologııalyq kezeńderi júrgiziledi. Bul jumysqa qosymsha 1 mln 160 myń teńge jumsalmaq.