SQO-da jazasyn ótep jatqan áıelder taýyq ósirýdi qolǵa aldy

PETROPAVL. QazAqparat – Soltústik Qazaqstan oblysyndaǵy áıelder kolonııasynda jazasyn óteýshiler taýyq pen qııar ósirip jatyr, arnaıy kıim tigedi, al jaqynda munda naýbaıhana jumysyn bastamaq, dep habarlaıdy QazAqparat tilshisi.

Petropavldaǵy №50 mekeme – áıelder kolonııasynda bıyldan bastap taýyq ósirý qolǵa alyndy. Jańa kásip bolǵandyqtan aldymen 120 jumyrtqaǵa arnalǵan ınkýbator ákelinip, nátıjesi kóńilden shyqqannan keıin óndiristi keńeıtken.

«Biz qolymyzdan kele me, joq pa, qanshasynan balapan shyǵatynyn kórmek boldyq. Keıin 580 jumyrtqaǵa arnalǵan ınkýbator aldyq. Odan da shyǵymdylyq joǵary bolyp, kóp balapan aldyq. Endi 1,5 myń jumyrtqaǵa arnalǵan qondyrǵyny ornattyq.

Broıler jumyrtqasy belgili bir kúni salynady. Bul óte jaqsy etti tuqym.

Taýyqtyń bul túriniń jumyrtqasynan 21 kún 8 saǵattan keıin balapan shyǵady.

Taýyq balapandaryn arnaıy orynǵa qyzyl tústi shamnyń astyna ornalastyramyz. Mindetti túrde antıbıotık, dárýmender beremiz. Eki aıdyń ishinde olar jetiledi», - deıdi osy fermada jumys isteıtin Olesıa Rýsak.

Olesıa Rýsak túzetý mekemesinde 5 jylǵa jýyq jazasyn ótedi. Ol munda jańa mamandyq meńgerip, jylyjaıda eńbek etti, úı janýarlaryn kútti. Jaqynda túzetý mekemesinen bosap shyqty.

«Bir aptadan keıin osy úırengen jerime sheber retinde jumysqa alyndym. Bul is maǵan unaıdy. 100 myń teńge eńbekaqym bar, ári jolymdy tóleıdi. Qazir qyzymmen, jıenderimmen birge turyp jatyrmyn», - deıdi áıel.

Túzetý mekemesiniń aýmaǵynda ornalasqan shaǵyn fermada 7 adam jumys isteıdi. Bul jerde taýyqtan basqa úı qoıanyn ósiredi.

«Úı qoıanynyń sanyn 180-ge jetkizgen edik, qazir 20-sy ǵana qaldy. Óıtkeni jańa jyldyń aldynda tapsyrys joǵary boldy», - deıdi Olesıa Rýsak.

Al 100 sharshy metr aýmaqty alyp jatqan jylyjaıda bıyl tek qııar jáne gıdropondy jemazyqty ósirip jatyr. Odan basqa júzim, lımon jáne qurma aǵashy ósedi. Onyń bárin sottalǵandar tuqymnan ósirgen eken.

Qazir túzetý mekemesinde 215 qyz-kelinshek jazasyn ótep jatyr. Sottalǵandardyń 98% jumyspen qamtylǵan.

«Mekeme aýmaǵynda búginde 7 jeke kásipker jumys isteıdi. Olardyń biri - bizdiń qyzmetkerlerge forma tigedi, óz dúkenderi bar, sonda satady. Endi biri medıtsına qyzmetkerleriniń kıimin tigedi. Taǵy bir jeke kásipker taýyq ósirýdi qolǵa aldy. Taýyq etimen, jumyrtqamen aınalysady. Al jaqynda naýbaıhana ashylmaq. Ol jerge bizdiń 4 sottalǵan jumysqa ornalasady. Bıznes josparlary daıyn», - deıdi Petropavldaǵy № 50 mekeme bastyǵynyń orynbasary Jeńis Elýbaev.