SQO-da «Jasyl el» jobasy boıynsha 700-ge jýyq jas jumysqa alynbaq

PETROPAVL. QazAqparat – Soltústik Qazaqstan oblysynda bıyl 665 jas «Jasyl el» baǵdarlamasy boıynsha jumysqa qabyldanbaq. Olardyń jartysy jumysqy kirisip te ketti, dep habarlaıdy QazAqparat tilshisi.

Bıyl «Qazaqstannyń bolashaǵy úshin» qoǵamdyq stýdentter birlestigi «Jasyl el» baǵdarlamasynyń oıdaǵydaı ótýine jaýapty. «Qazaqstannyń bolashaǵy úshin» qoǵamdyq stýdentter birlestiginiń tóraǵasy Rústem Armanovtyń aıtýynsha, joba maýsym-qazan aıynda júzege asyrylady. Bıyl 665 adam jumysqa alynýy tıis, qazir 339-y eńbek etip jatyr.

«Jasyl el» baǵdarlamasy boıynsha úsh jolmen jumysqa ornalasýǵa bolady: orman sharýashylyqtary, kásiporyndar jáne jastar resýrstyq ortalyqtary.

Orman sharýashylyqtarynda jumys istegen jaǵdaıda jastar 90 myń teńge shamasynda eńbekaqy alady. Óıtkeni olar «Jasyl el» jobasy arqyly ǵana emes, orman sharýashylyqtarynan da eńbekaqy alady. Kásiporyndarda, máselen, «Zenchenko» JShS-de bizdiń jastarǵa 70 myń teńge tóleıdi. Nátıjesinde jaýyngerlerimiz qolǵa 90 myń teńgeden artyq alatyn bolady. Biraq kásiporyndarǵa 18-ge tolǵan jastar ǵana alynady. Keı sharýashylyqtarǵa jigitter ǵana kerek. Óıtkeni jumys aýyr.

Jalpy joba 14 pen 35 jastaǵylarǵa arnalǵan. Sondyqtan biz jasóspirimderdi jastar resýrstyq ortalyǵyna qabyldaımyz. Munda olar ekologııalyq senbilikterge qatysady, jalǵyzilikti qarttarǵa qamqorlyq jasaıdy, olardyń jumysy zań boıynsha 4 saǵattan aspaıdy», – deıdi Rýstem Armanov.

Sonymen qatar turmysy tómen otbasydan shyqqan, múgedektigi bar jastardy jumysqa ornalastyrýǵa da basymdyq beriledi.

«Qazir Petropavldaǵy jastar resýrstyq ortalyǵyna 20 jastaǵy sal aýrýymen (DTsP aýrýymen – red) aýyratyn jigit jumysqa alyndy. Aýdandarda da bul jumys jaqsy jolǵa qoıylǵan. Jastarǵa eńbekaqydan bólek, sapaly forma da beriledi. Olar: qalpaq, kúrte, fýtbolka, krossovka, shalbar. Kıim-keshek aıdyń sońynda nemese tamyz aıynyń basynda úlestiriledi.

Bul jobanyń tárbıelik máni de zor. Jastar ekosenbilikterge qatysý arqyly ózderinen keıin qoqys tastamaýǵa úırenedi. Bizge ata-analar balalaryn tapsyrǵanda «kórsin, aqshanyń ońaı kelmeıtinin» dep beredi. Ásirese, qalanyń balalary qolmen jumys istemeıdi, sondyqtan olar úshin bul úlken tájirıbe», – deıdi «Qazaqstannyń bolashaǵy úshin» qoǵamdyq stýdentter birlestiginiń tóraǵasy Rústem Armanov.