SQO-da jasóspirim sıntetıkalyq esirtkini ájesiniń úıinde saqtaǵan
PETROPAVL. KAZINFORM – Petropavlda jedel ýákilder asa iri kólemde sıntetıkalyq esirtki jasyryp, taratty degen kúdikpen jasóspirimdi ustady. Kúdiktiden ishinde untaq tárizdi aq tústi zat salynǵan jáne satýǵa daıyndap qoıǵan 10 túıinshek tárkilendi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jasóspirimniń turǵylyqty jerinen esirtkini býyp-túıýge arnalǵan materıal tabyldy. Kúdikti esirtkini ájesiniń úıinde saqtaǵan. Nemeresiniń áreketinen beıhabar ájesi úıinen 3 paket esirtki tabylǵanda qatty shoshydy.
Saraptama tárkilengen esirtkiniń jalpy salmaǵy 191 gramm bolatyn α-PvP sıntetıkalyq esirtki ekenin kórsetti. Bul – tutas bir mektepti nashaqorlyqqa tartýǵa jetedi.
«Qolǵa túsken kezde kúdikti 17 jasta boldy. Qamaýda otyrǵanda kámelettik jasqa toldy. Qylmystyq is QR Qylmystyq kodeksiniń 297-babynyń 3-bóligi boıynsha tergelip jatyr. Ustalǵan jigit qashyqtyqtan esirtki taratýmen aınalysatyn ınternet-dúkenderdiń birinde nebári 3 aıǵa jaqyn ýaqyt jumys istegen. Tájirıbe kórsetkendeı, esirtki taratýshylardyń jumys merzimi osyndaı, budan keıin olar qamaýǵa alynyp, sottalady. Jastardan jeńil jolmen aqsha tabý týraly usynystarǵa senbeýlerin suraımyz. Asa iri kólemde esirtki ótkizý úshin 10 jyldan 15 jylǵa deıingi merzimge deıin bas bostandyǵynan aıyrý jazasy kózdelgenin eske salamyz», - deıdi SQO PD Esirtki qylmysyna qarsy is-qımyl basqarmasynyń bastyǵy Rýslan Saparov.
Byltyr SQO-da esirtki taratqany úshin 2 jasóspirim sottaldy.
Eske sala keteıik, buǵan deıin SQO-da respýblıkalyq mańyzy bar avtojoldy bes jerden sý shaıyp ketkenin jazǵan edik.
