SQO-da jasóspirimderge ekpe egý bastalady
Óńirlik kommýnıkatsııalar qyzmetinde SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov óńirdegi koronavırýs boıynsha jaǵdaı jáne vaktsınatsııa barysy týraly aıtyp berdi.
SQO-da indet bastalǵaly koronavırýs juqtyrýdyń 29 407 jaǵdaıy tirkelgen. Ótken táýlikte 163 adamda anyqtaldy, olardyń 90 %-ynda aýrý belgileri bolǵan. Petropavlda aýyrǵandardyń úlesi joǵary – 80 adam. 18 adam Qyzyljar aýdanynda, 15 – Aıyrtaý aýdanynda juqtyrǵan, qalǵandarynda kórsetkish onnan tómen.
«Ótken eki aptada oblysta qaýipti ınfektsııa juqtyrýdyń 2128 jaǵdaıy anyqtaldy. Onyń aldyndaǵy uqsas merzimmen salystyrǵanda 0,6 %-ǵa óskenin kóremiz. Sonyń ishinde 96,7 %-y epıdemıologııalyq kórsetkish boıynsha anyqtalǵan», - deıdi Arman Kúshbasov.
Jaqynda respýblıkanyń bas sanıtar dárigeriniń qaýlysyna sáıkes jasóspirimder, júkti jáne bala emizetin áıelder ekpe ala bastaıdy. SQO-ǵa Pfizer kompanııasynyń vaktsınasy aldaǵy eki aptada jetkizilmek.
«Esterińizge salamyn, 12 jastan asqan jasóspirimderge, 16-37 apta aralyǵyndaǵy júkti áıelderge jáne bala emizetin áıelderge bosanǵannan 42 kún ótkesin vaktsına qoıylady. Bul sanatqa jatatyndarǵa Pfizer kompanııasynyń vaktsınasy egiledi, onyń quramynda vırýs joq, sondyqtan KVI ınfektsııasyn týdyra almaıdy. Eń aldymen 16-18 jas aralyǵyndaǵy jasóspirimderge ekpe egiledi. Keıingi kezeńderde qalǵan jastaǵylardy qamtımyz. Jasóspirimderdi vaktsınatsııalaý erikti túrde, ata-ananyń jazbasha ruqsatymen júrgiziledi», - deıdi sanıtar dáriger.
SQO-da osy kúnge deıin 253 129 adam vaktsınanyń birinshi komponentin aldy. Jyl sońyna deıin 370 myńnan astam adam ekpe alýy qajet. Bul óńirdiń eresek turǵyndarynyń 90 %-y. Ázirge 68 %-y ǵana vaktsınatsııalandy. 235 978 adam tolyq kýrstan ótti. Bul shamamen jospardyń 63 %-y.
