SQO-da jarma ónimderin shyǵaratyn zamanaýı kásiporyn salynyp jatyr
PETROPAVL. KAZINFORM – Soltústik Qazaqstan oblysynda jarma jáne túrli dán ónimderin óndiretin joǵary tehnologııalyq zaýyt qurylysy júrip jatyr.
QR Aýyl sharýashylyǵy mınıstrliginiń málimetinshe, jobany «Qazaqstan Bıdaıy» JShS júzege asyrady. Jalpy quny 3 mlrd teńgeden asady. Qajetti ınfraqurylymdy tartý úshin oblystyq bıýdjetten 291 mln teńge bólingen.
Kásiporyn qurylysy byltyr mamyr aıynda bastaldy. Zaýytta astyqty óńdeýdiń tolyq óndiristik tsıkli engizilip, quny joǵary ónim shyǵarylady. Bul qazaqstandyq agroónerkásiptik ónimderdiń ishki jáne syrtqy naryqtardaǵy básekege qabilettiligin aıtarlyqtaı arttyrýǵa múmkindik bermek.
Kásiporynda toǵyz túrli ónim, sonyń ishinde ártúrli botqa shyǵarý josparlanyp otyr. Zaýyttyń jylyna 24-ten 30 myń tonnaǵa deıin daıyn ónim shyǵarmaq.
Nysanda qazir Ýkraınadan jetkizilgen zamanaýı jabdyq ornatylyp jatyr. Úsh óndiristik jelini iske qosý kózdelgen. Óndiristiń energııa tıimdiligi men ekologııalyq qaýipsizdigine erekshe nazar aýdarylady. Barlyq tehnologııalar halyqaralyq sapa standarttaryna saı bolady.
Zaýytty osy jyldyń tamyz–qyrkúıek aılarynda iske qosý josparlanǵan.
Buǵan deıin agroónerkásip kesheninde quny 3,3 trln teńge bolatyn 677 joba iske asyrylatynyn jazǵan edik.
Qazaqstan unyn Taıaý Shyǵys pen Afrıka elderine shyǵarý máselesi pysyqtalyp jatyr.