SQO-da zańsyz ań aýlaǵan ákeli-balaly brakoner ustaldy

PETROPAVL. QazAqparat – Soltústik Qazaqstan oblysy Qyzyljar aýdanynyń turǵyndary – ákesi men balasy sibir eligin atyp, ustaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, oqıǵa Qyzyljar aýdanynyń Lesnoı aýyldyq okrýginde bolǵan.

Ýchaskelik polıtsııa ınspektory Saǵıdolla Etekbaev 28 naýryz kúni saǵat 21.30 shamasynda aýyldaǵy avtojolmen ótip bara jatyp, joldyń shetinde toqtap turǵan «VAZ» avtokóligin baıqaǵan. Polıtseı toqtap, qandaı kómek qajet ekendigin suraǵan.

64 jastaǵy aýyl turǵyny kóliktiń synyp qalǵanyn, ulynyń qajetti bólshekti áne-mine ákeletini jaıly aıtqan.

Alaıda ýchaskelik ınspektor 29 jastaǵy jigitti baıqap qalǵan. Ol kólikke sibir eliginiń denesin súırep ákele jatyr eken.

Ýchaskelik ınspektor shuǵyl jedel-tergeý tobyn shaqyrdy. Kólikten 12 kalıbrli tegis uńǵyly qarý tabyldy.

Atalǵan fakti «Zańsyz ańshylyq» baby boıynsha sotqa deıingi tergep-tekserýlerdiń biryńǵaı tizilimine engizildi.

«Aýyl turǵynynyń aıtýynsha, ol qarýdyń serippesin aýystyryp, tekserip kórmek bolǵan. Sol úshin ulymen ormanǵa barǵan. Jolda olar elikti kórgen. Qazir tergeý júrgizilip jatyr, qajetti saraptamalar taǵaıyndaldy. Bul jyl basynan aýdanda anyqtalǵan zańsyz ań aýlaýdyń alǵashqy jaǵdaıy. Oblysta ań aýlaý maýsymy ótken jyldyń jeltoqsan aıynda jabylǵanyn soltústikqazaqstandyqtardyń esine salamyz», - deıdi Qyzyljar aýdanynyń PB bastyǵynyń mindetin atqarýshy Petr Klımov.