SQO-da zańsyz satylmaq bolǵan 150 lıtr spırt tárkilendi
PETROPAVL. KAZINFORM — Petropavl qalasynda júrgizilgen reıd barysynda polıtseıler burynǵy ortalyq kóterme bazar mańyndaǵy garaj kooperatıvteriniń birinde spırt quramdy ónimderdi garajdan zańsyz satý faktisin anyqtady. Bul týraly Polisia.kz jazdy.
Tártip saqshylary kólemi 5 lıtrlik 30 plastık bótelkeni jáne 0,5 lıtrlik 8 shyny bótelkedegi spırt quramdy ónimderdi tárkiledi. Sondaı-aq garajdan 491 blok temeki ónimi tabylyp, tárkilendi.
Jasyryn túrde satylǵan bul taýarlardyń eshqaısysynda aktsızdik markalar bolmaǵan jáne olardyń tutynýshylar úshin qaýipsizdigin rastaıtyn qujattary da joq. Iesine qatysty ákimshilik jaýapkershilik qarastyrylǵan. Aldyn ala esep boıynsha, tárkilengen spırt kólemi 150-den astam uzaqqa sozylatyn ishimdik otyrysyn uıymdastyrýǵa jeter edi. Al sýrrogat alkogol qoldanylatyn mundaı jaǵdaılar quqyq buzýshylyqtar men qylmystardyń jasalý qaýpin edáýir arttyrady.
— Alkogol — jeke tulǵaǵa qarsy qylmystardyń, bóten múlikke qol suǵýdyń, buzaqylyq áreketterdiń, túngi ýaqytta tynyshtyqty buzýdyń jáne ózge de quqyq buzýshylyqtardyń jıi kezdesetin sebepteriniń biri. 10 naýryzdan bastap Soltústik Qazaqstan oblysynda «Quqyqtyq tártip» jedel-profılaktıkalyq is-sharasy ótkizilgen. Alkogol aınalymyna qatysty zańnamanyń saqtalýyn baqylaý — krımınogendik jaǵdaıdy turaqtandyrý, zań men tártipti nyǵaıtý jolyndaǵy polıtsııanyń mańyzdy mindetteriniń biri, — deıdi Petropavl qalalyq polıtsııa basqarmasy bastyǵynyń orynbasary Isa Mýstafın.
Eske sala keteıik, buǵan deıin Jambylda etıl spırtin zańsyz óndirgen uıymdasqan qylmystyq top ustaldy.