SQO-da úı órtenip, eki adam mert boldy

Soltústik Qazaqstan oblysy Shal aqyn aýdanyndaǵy Semıpolka aýylynda bir úıdiń eki adamy órtten qaza tapty, dep habarlaıdy Kazinform.

SQO tótenshe jaǵdaılar departamenti bastyǵynyń orynbasary Dmıtrıı Rastıhınniń aıtýynsha, búgin tańǵy 4.50 kezinde Shal aqyn aýdandyq órt sóndirý qyzmetine Semıpolka eldi mekeninde órt shyqqany týraly habar túsken. 

Aýylǵa eń jaqyn órt sóndirý bólimshesi 40 km qashyqtyqta ornalasqan.

«Órt sóndirýshiler kelgende úı tolyq otqa oranyp úlgergen eken. Esik ishten jabyq bolǵan. Tek tańǵy 9.30 shamasynda ǵana órt tolyq sóndirildi. Oqıǵa ornynan bir adamnyń denesi tabyldy. Kórshilerdiń aıtýynsha, úıde er jáne áıel adam turǵan. Sondyqtan qazir ekinshisiniń denesi izdelip jatyr», - deıdi Dmıtrıı Rastıhın.

Jalpy jyl basynan SQO-da 30 adam órtten mert boldy. Byltyr osy aralyqta 36 adam tilsiz jaýdan jantásilim etken.

Turǵyn úılerde bolatyn órt sany azaıǵanymen, adamdardyń ıis tıip qaıtys bolý faktileri jıilep ketken.

Dmıtrıı Rastıhınniń aıtýynsha, tek bıyldyń ózinde 11 dam osylaı mert bolǵan. 

Olar pesh janyp bolmaı jatyp, murjasyn erte jaýyp tastaǵan.

Taǵy 27 adam ýlandy, olarǵa der kezinde kómek kórsetildi.