SQO-da úsh mektep tolyq, 61 mektep ishinara qashyqtan oqyp jatyr

PETROPAVL. KAZINFORM – Soltústik Qazaqstan oblysynda JRVI-men aýyrǵan balalar sany sońǵy úsh kúnde 977-ge azaıdy.

SQO bilim basqarmasynyń málimetinshe, 28 qarasha kúni aýyrǵan balalar sany sharyqtaý shegine jetip, monıtorıng barysynda 75 mektepten 2 746 oqýshynyń aýyryp jatqany anyqtalǵan. Saldarynan 402 synyptyń 4 myńǵa jýyq oqýshysy qashyqtan oqýǵa jiberildi. 

Mamandardyń aıtýynsha, qazir aýyrǵandar sany azaıyp keledi. Búginde 1 769 oqýshy vırýs juqtyryp, barlyǵy 274 synyptyń 2 602 oqýshysy ýaqytsha onlaın formatqa kóshirilgen. 

Tolyq qashyqtan oqytýǵa Aıyrtaý aýdanyndaǵy Aryqbalyq orta mektebi, Shal aqyn aýdanyndaǵy «Aqan-Baraq» orta mektebi jáne M. Ahmetbekov atyndaǵy orta mektep aýystyryldy. 

Sonymen qatar 61 mektepte jekelegen synyptar qashyqtan oqyp jatyr.

Petropavl qalasynda 23 mektep, Shal aqyn aýdanynda 9 mektep, Qyzyljar aýdanynda 3 mektep, Aqqaıyń aýdanynda 5 mektep, M. Jumabaev aýdanynda 6 mektep, Taıynsha aýdanynda 2 mektep onlaın formatqa kóshirildi. 

Sondaı-aq Tımırıazev aýdanynda 4 mektep, Jambyl aýdanynda 5 mektep jáne Petropavldaǵy oblystyq deńgeıdegi 4 mektep oqýshylary qashyqtan bilim alyp jatyr. 
Buǵan deıin ShQO-da 35 myńǵa jýyq oqýshy qashyqtan bilim alyp jatqanyn jazdyq. 

Sondaı-aq Premer-Mınıstr Oljas Bektenovtiń Senat depýtattarynyń qolaısyz meteorologııalyq jaǵdaıda mektepterdi, kolledjder men joǵary oqý oryndaryn qashyqtan oqytýǵa kóshirýge qatysty saýalyna jaýap bergenin jazǵan edik.