SQO-da úsh kúnde 18 mas júrgizýshi ustaldy
PETROPAVL. KAZINFORM — Soltústik Qazaqstan oblysynda polıtseıler «Quqyqtyq tártip» jedel-aldyn alý is-sharasyn ótkizip, kóptegen zańbuzýshylyqty anyqtady.
Bul is-shara 12-14 qyrkúıek aralyǵynda ótti. Departamenttiń baspasóz qyzmetiniń málimetinshe, bul kúnderi polıtseıler qoǵamdyq qaýipsizdikti erekshe baqylaýǵa aldy. Nátıjesinde 63 jasóspirimniń túngi ýaqytta zańdy ókilderinsiz kóshede júrgeni, kóshi-qon zańnamasyn buzýdyń 25 deregi tirkeldi. Zańsyz nemese erejege saı saqtalmaǵan 6 birlik tegis uńǵyly qarý tárkilendi. Qoǵamdyq oryndarda 179 adamnyń masań kúıde júrgeni anyqtaldy.
Al Aqjar aýdanynyń 46 jastaǵy turǵyny «Racer» markaly tirkelmegen skýterdi mas kúıinde, júrgizýshi kýáliginsiz basqarǵan. Medıtsınalyq saraptama onyń ortasha dárejede alkogoldik mas bolǵanyn kórsetti. Ózine de, ózgelerge de qaýip tóndirgen er adam 20 táýlikke ákimshilik qamaýǵa alyndy. Jalpy, sońǵy 3 kún ishinde óńir polıtseıleri mas kúıde kólik basqarýdyń 18 deregin anyqtady. Tártip saqshylarynyń aıtýynsha, onyń árbiri jol-kólik oqıǵasyna ákelip, aýyr saldarǵa soqtyrýy múmkin.
Buǵan deıin SQO-da sıntetıkalyq esirtki satqan 22 jastaǵy kúdikti ustalǵanyn jazǵan edik.