SQO-da úsh aptada 16 adamdy úsik shaldy

PETROPAVL. KAZINFORM – Petropavl qalalyq kópsalaly jedel medıtsınalyq kómek aýrýhanasynyń jaraqat bólimine jyl basynan beri 1134 adam qaraldy.

Emdeý mekemesiniń málimetinshe, dáriger kómegine júgingenderdiń 954-i – qala turǵyny, qalǵandary aýyldardan kelgen. Sonyń ishinde shamamen ár ekinshi adam kóshe jaraqatyn alǵan.

Qalǵandary kúndelikti turmysta aıaq, qolyn syndyryp, kúıik alyp, dárigerge qaralǵan. Sonymen qatar, 9 jaǵdaı jol-kólik oqıǵalarymen baılanysty bolǵan.

Aıaz qysqaly úsik shalǵandar sany artqan. Aýrýhanaǵa 16 turǵyn úsik shalý belgilerimen jetkizilip, 10 naýqas qazir statsıonarlyq em qabyldap jatyr. Keıbiriniń ómirine arasha túsý úshin olardy reanımatsııa bólimine jatqyzýǵa týra keldi. 

Máselen, jaraqat bólimine jetkizilgen 61 jastaǵy er adam qatty tońǵan eken. Teksere kele onyń eki aıaǵynyń tabany úsip ketkeni anyqtaldy. Aýrýhanaǵa túsken kezde er adam mas bolǵan. 

Birden jansaqtaý bólimine jatqyzylǵan 56 jastaǵy taǵy bir naýqas ta aýrýhanaǵa mas kúıde jetkizilgen. Onyń eki qolynyń da saýsaqtary úsip ketken. Dárigerler IV dárejeli úsik alý dıagnozyn qoıdy. Onyń da jaǵdaıy aýyr, medıtsınalyq kómek kórsetilip jatyr.

Dárigerler turǵyndardy qolaısyz aýa raıynda qaýipsizdik sharalaryn saqtaýǵa, ásirese alkogoldik ishimdikten bas tartyp, sýyqta uzaq júrmeýge shaqyrady.

SQO-da bul kúnderi qaıtadan kún qatty sýytyp, arnaıy qyzmetter halyqty eskertip jatyr. Búgin túnde synap baǵanasynyń -35 gradýsqa deıin tómendeýine baılanysty qoǵamdyq jáne dızel otynymen júretin kólikterdiń jolǵa shyǵýyna shekteý qoıyldy. 

Buǵan deıin BQO-da kóktaıǵaqtan jaraqat alǵandar sany 860-tan asqanyn jazǵan edik.