SQO-da tutynýshylar kóbine qaı salaǵa shaǵymdanady

PETROPAVL. KAZINFORM — Tutynýshynyń quqyǵyn buzǵan jaǵdaıda buryn satýshyǵa eskertý berilse, endi zań buzýshylyqtar úshin aıyppul qarastyrylǵan.

Soltústik Qazaqstan oblysy boıynsha Saýda jáne tutynýshylardyń quqyqtaryn qorǵaý departamenti basshysynyń orynbasary Ǵalymjan Abaevtyń aıtýynsha, sapasyz taýarlar men qyzmetter, jaýapsyz satýshylar men alaıaqtyq áreketter — kez kelgen tutynýshynyń basynan ótýi múmkin jaǵdaılar. Mundaı zań buzýshylyqtar úshin bıyl jaýapkershilik kúsheıtildi.

Máselen, satýshy nemese qyzmet kórsetýshi tarapynan tutynýshyǵa memlekettik jáne orys tilinde aqparat berilmese, taýardy zańmen belgilengen merzimde qaıtarý nemese aıyrbastaý sharty buzylsa, jazbasha shaǵymǵa jaýap berilmese — bul áreketter úshin ákimshilik jaýapkershilik qarastyrylǵan. Jeke tulǵalar úshin 5 AEK mólsherinde aıyppul, shaǵyn bıznes úshin — 10, orta bıznes úshin — 15, al iri bıznes úshin 25 AEK kóleminde aıyppul qarastyrylǵan. Eger zań buzýshylyq qaıtalansa, bul soma eki esege ósedi.

— Endi departament azamattardyń aryzdaryn ózderi qaraýǵa quqyly. Olardyń quzyretine ólsheý, tartý kezinde tutynýshyny aldaý, taýardyń sapasy týraly jalǵan aqparat berý nemese basqa da jańylystyrý áreketteri kiredi. Mysaly tutynýshy turmystyq tehnıka satyp alyp, ol kelesi kúni buzylyp qaldy. Bul jaǵdaıda satýshy taýardy keri alýdan bas tartsa, azamat departamentke shaǵymdana alady. Mundaı jaǵdaıda satýshyǵa aıyppul salynyp, tutynýshynyń quqyǵy qalpyna keltiriledi, — deıdi Ǵalymjan Abaev.

Mamannyń aıtýynsha, bıyl 8 aıda departamentke 345 ótinish túsken. Onyń ishinde 44% qanaǵattandyrylyp, 24% basqa organdardyń quzyretine berilgen. 8% aryz ıesi másele sheshilgen soń aryzyn qaıtaryp alǵan. Nátıjesinde 18 jospardan tys tekserý júrgizilgen. Eń kóp shaǵym túsetin salalar — bólshek saýda 42%, elektrondyq saýda — 26%, turǵyn úı-kommýnaldyq sharýashylyq — 4%, turmystyq qyzmetter — 3%.

— Azamattarǵa tutynýshy retinde quqyqtaryn qorǵaý úshin birneshe keńes usynar edim: barlyq chekti, kepildik talondaryn jáne kelisimsharttardy saqtaýdy ádetke aınaldyrý. Eger másele týyndasa, satýshyǵa jazbasha shaǵym jiberý; al eger jaýap bolmasa, Tutynýshylardyń quqyqtaryn qorǵaý departamentine júginý qajet, — deıdi Ǵalymjan Abaev.

Buǵan deıin SQO-da bıyl 122 sottalǵannyń jazasy qatańdatylǵanyn jazǵan edik.