SQO-da turǵyndar úshin elektr tarıfi burynǵydaı qalady

PETROPAVL. KAZINFORM — Soltústik Qazaqstan oblysynda 1 sáýirden bastap elektr energııasyn bólshek saýdada satý úshin jańa shekti baǵa bekitildi.  

Soltústik Qazaqstan Elektrjelistik taratý kompanııasynyń málimetinshe, 2024 jyldan beri halyq úshin elektr energııasynyń tarıfi ózgerissiz qalyp otyr. Al 1 sáýirden bastap elektr energııasyn satýǵa jańa shekti baǵa engizilgenimen, bul negizinen basqa tutynýshylarǵa qatysty.

Halyqqa ol áser etpeıdi. Turǵyndar úshin bazalyq tarıf burynǵy deńgeıde — ár kVtsaǵ úshin 17,14 teńge (QQS-syz), al salyqpen birge 19,88 teńge bolyp qalady.

Sonymen qatar, elektr energııasyna tólem tutynǵan kólemge baılanysty esepteledi. Mysaly, saralanǵan tarıfpen elektr plıtasyn qoldanbaıtyn turǵyndar aıyna 70 kVtsaǵ deıin paıdalansa, ár kVtsaǵ úshin shamamen 19,22 teńge tóleıdi.

Eger tutyný kólemi 70 pen 150 kVtsaǵ aralyǵynda bolsa — 23,86 teńge, al 150 kVtsaǵ-tan assa — 29,82 teńge tóleıdi. Al elektr plıtasyn qoldanatyndar úshin jeńildik bar: 90 kVtsaǵ deıin — 18 teńge, 90-170 kVtsaǵ aralyǵynda — 23,86 teńge, al 170 kVtsaǵ-tan joǵary bolsa — 29,82 teńge tólemek. Kompanııa osylaısha halyqqa qosymsha qarjylyq júkteme túsirmeı, áleýmettik turaqtylyqty saqtaýdy kózdep otyr.

Al jańa tarıfter negizinen basqa sanattaǵy tutynýshylarǵa qatysty. Máselen, elektr energııasyn turmystyq emes maqsatta paıdalanatyndar — kásipkerlik nysandar, uıymdar jáne t. b. úshin baǵa 32,04 teńge, al QQS-pen birge 37,17 teńge bolady.

Bıýdjetten qarjylandyrylatyn zańdy tulǵalar — mektepter, aýrýhanalar, memlekettik mekemeler úshin tarıf 49,48 teńge, QQS-pen 57,40 teńge bolyp belgilendi.

Al áleýmettik mańyzy bar azyq-túlik ónimderin óndirýshiler úshin baǵa 29,74 teńge, al QQS-pen 34,50 teńge bolmaq.

Buǵan deıin Aqtaýda kommýnaldyq kásiporynǵa aıyppul salynyp, tarıf arzandaǵanyn jazǵan edik.