SQO-da tumaýdyń tórt túri taraǵan

PETROPAVL. KAZINFORM – Soltústik Qazaqstan oblysynda epıdmaýsym bastalǵaly 57 myńnan astam adam JRVI-men aýyrdy. 

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, bul ótken jyldyń sáıkes kezeńimen salystyrǵanda 30% tómen. Syrqattanǵandardyń 38 myńǵa jýyǵy nemese 66% - 14 jasqa deıingi balalar arasynda tirkelgen. 

Tek sońǵy aptada oblysta JRVI-diń 3 myń jaǵdaıy anyqtaldy.

- Oblysta tumaýmen aýyrǵandar sany 85-ke jetti. Onyń ishinde A tıpti tumaýdy 79 adam juqtyrdy. Sonyń ishinde H1N1-pdm09 - 72 jaǵdaıy, H1N1 - 4 jaǵdaıy, H3N2 - 3 jaǵdaıy anyqtalsa, V tıpti tumaýmen 6 adam aýyrǵan. Tumaýdy juqtyrǵandardyń 31-i - 14 jasqa deıingi balalar, júkti áıelder arasynda 4 jaǵdaı tirkeldi. Olardyń eshqaısy tumaýǵa qarsy ekpe almaǵan, - deıdi Arman Kúshbasov. 

Mamannyń aıtýynsha, JRVI men tumaýdyń belgileri uqsas: joǵary temperatýra, jalpy ıntoksıkatsııa, álsizdik, tamaq aýrýy, muryn bitelýi.

- JRVI men tumaýdyń alǵashqy belgileri baıqalǵan kezde ózin-ózi emdeýge bolmaıdy, dereý medıtsınalyq kómekke júginý qajet, dárigerdi úıge shaqyrǵan jón. Aýrýdy taratpaý úshin naýqas balany balabaqshaǵa nemese mektepke jibermeý kerek. Uzaq merzimdi aýrý kóbinese asqyný týdyrady. Olardyń ishindegi eń kóp taralǵany jáne qaýiptisi – ókpeniń qabynýy, - deıdi sanıtar dáriger.

Buǵan deıin SQO-da bir aıda jeti bala kókjótelge shaldyqqanyn jazǵan edik.